بھارت کسی غلط فہمی میں نہ رہے، اگلی بار پاکستان کا جواب پہلے سے بھی زیادہ برق رفتار اور شدید ہوگا:فیلڈ مارشل

راولپنڈی:چیف آف دی آرمی اسٹاف و چیف آف ڈیفنس فورسز فیلڈ مارشل سید عاصم منیر نے کہا ہے کہ بھارت کسی غلط فہمی یا خود فریبی میں مبتلا نہ رہے، اگلی بار پاکستان کا جواب پہلے سے بھی زیادہ برق رفتار اور شدید ہوگا۔

مسلح افواج کے افسران سے خطاب کرتے ہوئے فیلڈ مارشل سید عاصم منیر نے کہا کہ نئے قائم ہونے والے ڈیفنس فورسز ہیڈ کوارٹرز کا قیام ایک تاریخی تبدیلی ہے۔ بڑھتے اور بدلتے ہوئے خطرات کے پیش نظر ضروری ہے کہ ہم ملٹی ڈومین آپریشنز کو تینوں مسلح افواج کے متحد نظام کے تحت مزید مضبوط اور موثر بنائیں۔

انہوں نے کہا کہ ڈیفنس فورسز ہیڈ کوارٹرز کا قیام اس اہم تبدیلی کی طرف ایک بڑا قدم ہے۔ ہر سروس اپنی انفرادی خصوصیات اور آپریشنل تیاریوں کو برقرار رکھے گی، جبکہ ڈیفنس فورسز کا ہیڈکوارٹر تمام سروسز کے آپریشنز کو مربوط اور ہم آہنگ کرے گا۔

آرمی چیف نے مزید کہا کہ بالا کمانڈ کی یکجہتی کے ساتھ تینوں افواج اپنی خود مختاری اور اپنے تنظیمی ڈھانچے کو برقرار رکھیں گی۔

چیف آف ڈیفنس فورسز نے طالبان رجیم کو واضح پیغام دیتے ہوئے کہا کہ ان کے پاس صرف دو راستے ہیں—یا تو فتنۃ الخوارج کا ساتھ چھوڑیں یا پھر پاکستان دشمنی ترک کریں، اس کے سوا کوئی آپشن موجود نہیں۔

فیلڈ مارشل عاصم منیر نے کہا کہ پاکستان ایک امن پسند ملک ہے، تاہم کسی کو بھی یہ اجازت نہیں دی جائے گی کہ وہ پاکستان کی خودمختاری، علاقائی سالمیت یا قومی عزم کو للکارے۔

چیف آف ڈیفنس فورسز نے کہا کہ سب جان لیں کہ پاکستان کا تصور ناقابلِ تسخیر ہے، اور اس کی حفاظت ایمان سے سرشار جانبازوں اور متحد قوم کے مضبوط عزم نے کر رکھی ہے۔
آخر میں انہوں نے کہا: پاکستان ہمیشہ زندہ باد!