وانا کیڈٹ کالج پر حملہ ناکام، فیلڈ مارشل نے آپریشن پر لمحہ بہ لمحہ نظر رکھی

کیڈٹ کالج وانا کے اساتذہ اور کیڈٹس نے دہشت گردی کے خلاف اپنے عزم کا ثبوت دیتے ہوئے ثابت کیا ہے کہ وہ کسی بھی خطرے کے سامنے ڈٹ کر کھڑے ہیں۔ ذرائع کے مطابق فیلڈ مارشل عاصم منیر نے آپریشن کے ہر لمحے پر نظر رکھی اور ہدایت دی کہ “قوم کے یہ معمار ہمارا سرمایہ ہیں، ہرگز کوئی آنچ نہ آنے پائے۔”

کیڈٹس نے بتایا کہ پاک فوج کے جوان 24 گھنٹے سے زیادہ وقت تک کیڈٹس اور خوارج کے درمیان ڈھال بن کر کھڑے رہے اور کئی شہادتیں دے کر بچوں کو محفوظ بنایا۔

آپریشن کمانڈر کرنل محمد طاہر نے تفصیلات بتاتے ہوئے کہا کہ 10 نومبر کو پانچ افغانی خوارج نے کیڈٹ کالج وانا پر حملہ کیا۔ خوارج نے کالج، جو پاک فوج کی جانب سے ساؤتھ وزیرستان کی عوام کے لیے قیمتی تحفہ ہے، کو نشانہ بنانے کی کوشش کی۔ ایک خودکش حملہ آور نے دھماکہ کیا جبکہ دیگر خوارج نے گیٹ کے ذریعے داخل ہونے کی کوشش کی۔

کرنل محمد طاہر نے کہا کہ دہشت گردوں نے ابتدا میں زیر تعلیم بچوں کو یرغمال بنانے کی کوشش کی، مگر سیکیورٹی فورسز کی بروقت کارروائی نے خوارج کے مذموم عزائم کو ناکام بنا دیا۔ دہشت گردوں کو مخصوص بلاک میں محدود کر کے طلبا کی حفاظت یقینی بنائی گئی۔

خیبرپختونخوا کے ضلع شمالی وزیرستان کے علاقے وانا میں کالج میں داخل ہونے والے چار دہشت گرد ہلاک کر دیے گئے، جبکہ تمام 650 طلبا و اساتذہ کو بحفاظت ریسکیو کر لیا گیا۔ کرنل طاہر کے مطابق رات تقریباً 10 بجے سے ساڑھے 10 بجے کے درمیان بھرپور آپریشن کے بعد تمام خوارج کو ہلاک کر دیا گیا۔

ایک زیر تعلیم کیڈٹ نے بتایا کہ عصر کے وقت ڈرل کمپٹیشن کی تیاری جاری تھی کہ خودکش دھماکہ ہوا۔ ہمیں فوراً معلوم ہو گیا کہ یہ حملہ تعلیم کے دشمنوں نے کیا ہے، جو ہمیں تعلیم سے روکنا چاہتے ہیں۔ پاک فوج کے جوانوں نے ہمیں محفوظ مقام پر منتقل کیا اور الحمدللہ، بر وقت کارروائی کے باعث ایک خوفناک دہشت گردی کا منصوبہ ناکام بنا دیا گیا۔

کیڈٹس نے مزید کہا کہ دہشت گرد چاہے کچھ بھی کریں، ہمیں تعلیم سے نہیں روک سکتے۔ اساتذہ نے بھی یقین دہانی کرائی کہ “آپ پر سکون ہو جائیں، اب پاک فوج آگئی ہے۔”

یہ کامیاب آپریشن نہ صرف دہشت گردی کے خطرے کو ناکام بنانے کا ثبوت ہے بلکہ کیڈٹس اور اساتذہ کے بلند حوصلے اور پاک فوج کی بروقت کارکردگی کی بھی مثال ہے۔