پاکستان کی جانب سے غزہ کیلئے 100 ٹن امدادی سامان پر مشتمل 25ویں کھیپ روانہ

اسلام آباد:پاکستان نے غزہ کے مظلوم عوام کے لیے 100 ٹن امدادی سامان پر مشتمل 25 ویں امدادی کھیپ روانہ کر دی۔ لاہور ایئرپورٹ سے روانہ کیے گئے اس سامان میں خیمے، ضروری خوراک اور دیگر اہم اشیا شامل ہیں۔

نیشنل ڈیزاسٹر مینجمنٹ اتھارٹی (این ڈی ایم اے) کے ترجمان کے مطابق وزیراعظم کی خصوصی ہدایات پر پاکستان غزہ کے عوام کے لیے اپنا غیر متزلزل تعاون جاری رکھے ہوئے ہے۔

ترجمان کا کہنا ہے کہ حکومت پاکستان کی سرپرستی میں این ڈی ایم اے نے الخدمت فاؤنڈیشن کی چارٹرڈ پرواز کے ذریعے 100 ٹن امدادی سامان کی روانگی کی سہولت فراہم کی۔

اس امدادی کھیپ میں بے گھر خاندانوں کے لیے خوراک کے علاوہ خیمے، ٹارپولین شیٹس اور جیری کین شامل کیے گئے ہیں۔

این ڈی ایم اے کے مطابق پاکستان اب تک غزہ کے لیے 25 امدادی قافلے روانہ کر چکا ہے، جن میں مجموعی طور پر 2 ہزار 427 ٹن امدادی سامان شامل ہے۔

امدادی سامان کی روانگی کے موقع پر منعقدہ تقریب میں وفاقی وزیر برائے عوامی امور رانا مبشر اقبال کے علاوہ این ڈی ایم اے، وزارت خارجہ اور الخدمت فاؤنڈیشن کے نمائندے بھی موجود تھے۔