عوام کے لیے خوشخبری، پیٹرول کی قیمت میں بڑی کمی متوقع

اسلام آباد:ملک بھر میں پیٹرولیم مصنوعات کی قیمتوں میں بڑی کمی کا امکان ظاہر کیا جا رہا ہے، جو عوام کے لیے ایک اہم ریلیف ثابت ہو سکتی ہے۔

ذرائع کے مطابق 16 اکتوبر سے پیٹرول کی قیمت میں 6 روپے 10 پیسے فی لیٹر تک کمی متوقع ہے، جب کہ ہائی اسپیڈ ڈیزل کی قیمت میں 97 پیسے فی لیٹر کمی کا امکان ہے۔

اسی طرح مٹی کے تیل کی قیمت میں 2 روپے 75 پیسے فی لیٹر اور لائٹ ڈیزل آئل کی قیمت میں 1 روپے 64 پیسے فی لیٹر کمی کا امکان ظاہر کیا گیا ہے۔

ذرائع کا کہنا ہے کہ پیٹرولیم انڈسٹری نے اپنی تفصیلی ورکنگ مکمل کر کے رپورٹ اوگرا کو بھجوا دی ہے۔

اوگرا آج شام قیمتوں میں ردوبدل کی سمری پیٹرولیم ڈویژن کے ذریعے وزارتِ خزانہ کو ارسال کرے گی۔

ذرائع کے مطابق وزارتِ خزانہ کل وزیراعظم سے مشاورت کے بعد نئی قیمتوں کی حتمی منظوری دے گی، جس کے بعد پیٹرولیم مصنوعات کی نئی قیمتوں کا باضابطہ اعلان کیا جائے گا۔