آئمہ کرام کے لیے ’’اعزازیہ کارڈ برائے امام مسجد‘‘ کی منظوری

لاہور:وزیراعلیٰ پنجاب مریم نواز نے صوبے بھر کے آئمہ کرام کے لیے ’’اعزازیہ کارڈ برائے امام مسجد‘‘ کی منظوری دے دی ہے۔ وزیراعلیٰ کی زیرِ صدارت اجلاس میں فیصلہ کیا گیا کہ کارڈ کے اجرا کی آخری تاریخ فروری 2026 مقرر کی گئی ہے، جبکہ یکم جنوری سے اعزازیہ کی ادائیگی کا باقاعدہ آغاز کیا جائے گا۔ پہلی مرتبہ یہ ادائیگیاں پے آرڈر کے ذریعے کی جائیں گی۔

اجلاس میں بتایا گیا کہ یکم فروری سے امام مساجد کو ادائیگیاں ’’وزیراعلیٰ پنجاب اعزازیہ کارڈ‘‘ کے ذریعے منتقل ہوں گی۔ مریم نواز نے متعلقہ حکام کو ہدایت دی کہ آئمہ کرام کی رجسٹریشن کا عمل بغیر تعطل جاری رکھا جائے تاکہ تمام مستحق آئمہ اس سہولت سے فائدہ اٹھا سکیں۔

پنجاب بھر میں اب تک 62 ہزار 994 رجسٹریشن فارم موصول ہو چکے ہیں جن کی تصدیق کا عمل جاری ہے۔ فیصلہ کیا گیا کہ ملک و قوم کے مفادات کے خلاف سرگرمیوں، اخلاقی یا مالی جرائم میں ملوث کسی بھی امام مسجد کا اعزازیہ فوراً بند کر دیا جائے گا۔

اجلاس میں مزید بتایا گیا کہ صوبے میں مسجد مینجمنٹ کمیٹیاں اور تحصیل سطح پر مینجمنٹ کمیٹیاں قائم کی جاچکی ہیں۔ اسسٹنٹ کمشنرز کو ہر ماہ آئمہ کرام کے ساتھ باقاعدہ میٹنگ منعقد کرنے کی ہدایت بھی جاری کی گئی ہے۔

وزیراعلیٰ نے سیف سٹی کیمروں اور سرکاری املاک کو نقصان پہنچانے والوں کے خلاف سخت کارروائی کے لیے ضروری قانون سازی کا فیصلہ بھی منظور کر لیا۔ اجلاس میں غیرقانونی طور پر مقیم افغان باشندوں کے خلاف جاری آپریشن کو مسلسل برقرار رکھنے کا حکم بھی دیا گیا۔