عمران خان اکیلا مجرم نہیں اسے اقتدار میں لانے والے بھی قصوروار ہیں:نواز شریف

لاہور:مسلم لیگ (ق) کے قائد میاں نواز شریف نے کہا ہے کہ پنجاب کے ضمنی انتخابات میں تحریک انصاف نے بائیکاٹ کا دعویٰ کیا، مگر یہ کیسا بائیکاٹ تھا کہ عمر ایوب کی اہلیہ خود الیکشن میں حصہ لے رہی تھیں؟ انہوں نے کہا کہ عوام نے اس منافقانہ طرزِ سیاست کو اچھی طرح پہچان لیا ہے۔

نومنتخب ارکانِ اسمبلی سے خطاب کرتے ہوئے نواز شریف نے کہا کہ تحریک انصاف کے دورِ حکومت میں ملک کو تباہی، بدتمیزی اور انتشار کے سوا کچھ نہیں ملا۔ ان کے دور میں مہنگائی 39 فیصد تک پہنچ گئی، جبکہ ہمارے دور میں مہنگائی صرف 3 فیصد تھی۔ اگر ترقی کا سلسلہ نہ روکا جاتا تو آج پاکستان عالمی سطح پر ایک مضبوط معاشی مقام رکھتا اور آئی ایم ایف کے سامنے جھکنے کی ضرورت پیش نہ آتی۔

انہوں نے کہا کہ 2018ء سے 2022ء تک ملک میں جو سیاسی انتشار، نفرت اور جھوٹ کی سیاست پروان چڑھی اس کے ذمہ دار پی ٹی آئی کے رہنما اور وہ عناصر بھی ہیں جنہوں نے انہیں اقتدار تک پہنچایا۔ میرٹ کی پامالی نے اداروں کو کمزور کیا اور ملک کو پیچھے دھکیل دیا۔

نواز شریف کا کہنا تھا کہ پنجاب کے ضمنی انتخابات نے واضح کردیا کہ عوام نے جھوٹ، گالم گلوچ اور انتشار کی سیاست کو مسترد کردیا ہے۔ نومنتخب ارکانِ اسمبلی نے ثابت کیا ہے کہ فتنہ اور نفرت کے بیانیے کی اس ملک میں کوئی جگہ نہیں۔

انہوں نے بتایا کہ موجودہ حکومت میرٹ، خدمت اور ترقی کے اصول پر کام کر رہی ہے۔ صوبے میں لیپ ٹاپ تقسیم ہو رہے ہیں، سڑکوں کی تعمیر جاری ہے، گرین بسیں چل رہی ہیں، امن و امان بہتر ہو رہا ہے اور مذہبی تفریق کے بغیر راشن کارڈ جاری کیے جا رہے ہیں۔ مزید نئے منصوبے بھی جلد سامنے آئیں گے۔