جنرل ساحر شمشاد مرزا عہدے سے سبکدوش، 40 سالہ خدمات کو شاندار خراجِ تحسین

اسلام آباد:جوائنٹ اسٹاف ہیڈکوارٹرز میں چیئرمین جوائنٹ چیفس آف اسٹاف کمیٹی جنرل ساحر شمشاد مرزا کے اعزاز میں الوداعی تقریب منعقد ہوئی، جس میں ان کی 40 سالہ شاندار فوجی خدمات کو خراجِ تحسین پیش کیا گیا۔

آئی ایس پی آر کے مطابق جنرل ساحر شمشاد مرزا چار دہائیوں پر مشتمل اپنی خدمات مکمل کرنے کے بعد عہدے سے سبکدوش ہو رہے ہیں۔ الوداعی تقریب میں سابق چیئرمین جوائنٹ چیفس آف اسٹاف کمیٹی اور تینوں مسلح افواج کے سینئر افسران نے شرکت کی۔

اپنے خطاب میں جنرل ساحر شمشاد مرزا نے اللہ کا شکر ادا کرتے ہوئے کہا کہ انہیں ملک و قوم کی خدمت اخلاص، محنت اور پیشہ ورانہ مہارت کے ساتھ انجام دینے کی توفیق ملی۔ انہوں نے پاک فوج کی قربانیوں کو سلام پیش کیا اور شہداء و ان کے اہل خانہ کو زبردست خراجِ عقیدت پیش کیا۔

انہوں نے کہا کہ موجودہ عالمی اور علاقائی حالات میں مضبوط دفاع قومی سلامتی کی بنیاد ہے۔ پاکستان کا دفاع مضبوط ہے اور پاک فوج کے افسر اور جوان اس کو مزید مستحکم بنانے کے لیے ہمیشہ تیار رہتے ہیں۔

تقریب کے موقع پر تینوں سروسز کے چاق و چوبند دستے نے جنرل ساحر شمشاد مرزا کو گارڈ آف آنر بھی پیش کیا۔