بچے میری ریڈ لائن ہیں، ان کی حفاظت ہماری ذمہ داری ہے:وزیراعلیٰ پنجاب

لاہور: وزیراعلیٰ پنجاب مریم نواز شریف نے کہا ہے کہ صوبے میں بچوں کے خلاف ہونے والے جرائم کا مکمل خاتمہ کیا جائے گا۔

بچوں کے جنسی استحصال، بدسلوکی اور تشدد کی روک تھام و بحالی کے عالمی دن کے موقع پر اپنے پیغام میں انہوں نے کہا کہ بچوں کے ساتھ جنسی زیادتی، بدسلوکی اور تشدد صرف قانون شکنی نہیں بلکہ انسانیت کے خلاف بغاوت ہے۔

ان کا کہنا تھا کہ “بچے میری ریڈ لائن ہیں، سب مجھے پیارے ہیں، اور ان کی حفاظت ہماری ذمہ داری ہے۔”

وزیراعلیٰ نے کہا کہ بچوں کے خلاف جرائم میں ملوث عناصر معاشرے کے ناسور ہیں اور انہیں پنجاب سے پوری قوت کے ساتھ ختم کیا جائے گا۔ انہوں نے بتایا کہ بچوں کو محفوظ بنانے کے لیے صوبے میں پاکستان کا پہلا ورچوئل سینٹر برائے چائلڈ سیفٹی قائم کیا گیا ہے۔

مریم نواز شریف کے مطابق ڈیجیٹل ٹیکنالوجی کو مضبوط گورننس کے ساتھ ملا کر بچوں اور شہریوں کے تحفظ کا ایک جدید اور مؤثر نظام تشکیل دیا گیا ہے۔ یہ ورچوئل سینٹر اب تک ہزاروں لاپتہ بچوں اور بزرگوں کو ان کے اہلِ خانہ سے ملا چکا ہے۔

انہوں نے والدین اور شہریوں سے اپیل کی کہ اگر پنجاب میں کسی بچے کے لاپتہ ہونے کا واقعہ پیش آئے تو فوراً ورچوئل سینٹر برائے چائلڈ سیفٹی سے رابطہ کریں تاکہ بروقت کارروائی کی جا سکے۔