انسداد دہشت گردی عدالت نے سہیل آفریدی کیخلاف اشتہاری کارروائی شروع کر دی

اسلام آباد:انسداد دہشت گردی عدالت نے وزیراعلیٰ خیبر پختونخوا سہیل آفریدی اور دیگر نامزد ملزمان کے خلاف اشتہاری کارروائی کا باضابطہ آغاز کر دیا ہے۔ عدالتی احکامات کی روشنی میں جوڈیشل کمپلیکس سمیت مختلف اہم مقامات پر ملزمان کی طلبی کے نوٹسز آویزاں کر دیے گئے ہیں۔
عدالتی نوٹسز میں وزیراعلیٰ خیبر پختونخوا سہیل آفریدی، مینا خان، امجد خان، شفیع اللہ جان اور امجد آفریدی کو فوری طور پر انسداد دہشت گردی عدالت میں پیش ہونے کی ہدایت کی گئی ہے۔ نوٹسز کے مطابق ملزمان عدالتی احکامات کی تعمیل نہیں کر رہے یا روپوش ہیں، جس کے باعث عدالت نے قانونی کارروائی کو آگے بڑھاتے ہوئے یہ سخت قدم اٹھایا ہے۔
انسداد دہشت گردی عدالت کی جانب سے جاری کردہ نوٹسز میں واضح کیا گیا ہے کہ تمام نامزد ملزمان عدالت میں حاضر ہو کر اپنا مؤقف پیش کریں۔ نوٹسز میں اس بات پر بھی زور دیا گیا ہے کہ یہ ملزمان کو عدالت میں پیش ہونے کا آخری موقع فراہم کیا جا رہا ہے۔
عدالت نے خبردار کیا ہے کہ اگر سیکشن 87 کے تحت جاری کارروائی کے دوران ملزمان عدالت میں پیش نہ ہوئے تو انہیں باضابطہ طور پر اشتہاری قرار دے دیا جائے گا۔ عدالتی حکام کے مطابق نوٹسز کی تعمیل نہ ہونے کی صورت میں قانون کے مطابق مزید سخت اقدامات بھی کیے جائیں گے۔