رس گلے ختم ہونے پر شادی کی تقریب میدان جنگ بن گئی

بھارتی ریاست بہار کے ضلع بودھگیا میں شادی کی تقریب اس وقت ہنگامہ آرائی میں تبدیل ہوگئی جب کھانے میں رس گلے کم ہونے پر دلہا اور دلہن کے اہلِ خانہ ایک دوسرے سے لڑ پڑے۔ اس واقعے کی ویڈیو سوشل میڈیا پر تیزی سے وائرل ہوگئی ہے۔

بھارتی میڈیا کے مطابق شادی کی ابتدائی رسومات مکمل ہونے کے بعد دلہا اور دلہن منڈپ کی طرف بڑھ رہے تھے کہ اچانک کھانے میں رس گلے کم ہونے پر تلخ کلامی شروع ہوئی جو دیکھتے ہی دیکھتے شدید لڑائی میں بدل گئی۔

یہ واقعہ اس ہوٹل میں پیش آیا جہاں دلہن کا خاندان مقیم تھا۔ ہوٹل میں نصب سی سی ٹی وی کیمروں نے پورا منظر ریکارڈ کر لیا، جسے دیکھ کر لوگ حیران رہ گئے۔

ویڈیو میں واضح طور پر دیکھا جا سکتا ہے کہ دونوں خاندان ایک دوسرے پر کرسیاں اور برتن پھینک رہے ہیں جبکہ بعض افراد کو دھکے دیتے اور گھونسے مارتے بھی دیکھا گیا ہے۔

رپورٹس کے مطابق یہ واقعہ 29 نومبر کو پیش آیا، جس کے بعد دلہن کے اہلِ خانہ نے دلہا کے خاندان کے خلاف جہیز کا مقدمہ بھی درج کرا دیا ہے۔