پنجاب میں قبضہ مافیا کا خاتمہ ، 1005 کیسز صرف 48 گھنٹوں میں حل

پنجاب میں زمین ہتھیانے والے غاصبوں کا دور ختم ہو گیا ہے۔ پنجاب حکومت نے صرف دو دن میں 1005 زمینوں کے کیسز حل کر کے ایک نیا ریکارڈ قائم کر دیا۔
برسوں سے عدالتی پیچیدگیوں کا سامنا کرنے والے 1005 خاندانوں کو 48 گھنٹوں میں ان کی زمین اور ملکیت واپس مل گئی۔
وزیر اعلیٰ مریم نواز شریف کی قیادت میں پراپرٹی آرڈیننس کے مؤثر نفاذ پر اجلاس ہوا، جس میں پنجاب حکومت کی دو دن میں اتنے زیادہ کیسز حل کرنے کی رپورٹ پیش کی گئی۔
وزیر اعلیٰ نے باریک بینی سے جائزہ لیا اور ہدایت دی کہ زمین کے کیسز کا فیصلہ ہونے کے فوراً بعد قبضہ بھی منتقل کیا جائے، تاکہ اصل مالک کی ملکیت زمین پر نظر آئے۔ انہوں نے کہا کہ پنجاب کے ہر مرلے، ہر کنال، ہر ایکڑ پر صرف اصل مالک کا قبضہ ہوگا۔
مریم نواز شریف نے خاص طور پر کہا کہ خواتین کے زمین کے کیسز کو ترجیح دی جائے۔
انہوں نے شہریوں سے اپیل کی کہ اگر کسی زمین یا پراپرٹی پر ناجائز قبضہ ہے تو اپنے متعلقہ ڈپٹی کمشنر آفس میں درخواست دیں، جس پر چند دنوں میں فیصلہ کیا جائے گا۔