وزیراعظم کی ہدایت پر تنخواہ دار طبقے پر ٹیکس کم کرنے کا فیصلہ

اسلام آباد:چیئرمین ایف بی آر راشد محمود لنگڑیال نے بتایا ہے کہ وزیراعظم شہباز شریف نے تنخواہ دار طبقے پر ٹیکس کم کرنے کی ہدایت دے دی ہے۔

پاکستان بزنس کونسل کے سیمینار سے خطاب کرتے ہوئے انہوں نے کہا کہ حکومت نے آئندہ بجٹ میں تنخواہ دار طبقے کے لیے ٹیکس میں کمی پر باضابطہ طور پر کام شروع کر دیا ہے۔ اس کے ساتھ ساتھ وزیراعظم نے بڑی کمپنیوں پر لگے ہوئے سپر ٹیکس میں کمی کی بھی ہدایت جاری کی ہے، جس پر حکومت مشاورت کر رہی ہے۔

چیئرمین ایف بی آر کے مطابق وفاقی حکومت آئندہ مرحلوں میں بڑی کمپنیوں اور کاروباری اداروں پر لگے سپر ٹیکس کو آہستہ آہستہ کم کرنے اور آخرکار مکمل ختم کرنے کے حق میں ہے۔ اس حوالے سے عالمی مالیاتی ادارے (آئی ایم ایف) سے بھی گفتگو کی جائے گی، کیونکہ اس فیصلے کا مقصد ملک میں سرمایہ کاری بڑھانا ہے۔

انہوں نے کہا کہ ٹیکس ریٹ میں کمی اسی صورت ممکن ہے جب ملک میں ٹیکس دینے والے افراد کی تعداد بڑھے۔ جتنے زیادہ لوگ ٹیکس نیٹ میں آئیں گے، ٹیکس کی شرح اتنی ہی کم کی جا سکے گی۔