ایف آئی اے کا جعلی یا مشتبہ طلبی نوٹسز روکنے کے لیے اہم فیصلہ

راولپنڈی:ایف آئی اے نے جعلی یا مشتبہ طلبی نوٹسز روکنے کے لیے اہم فیصلہ کیا ہے۔

ایف آئی اے نے نظام کو شفاف بنانے اور جعلی نوٹسز کے اجرا کو روکنے کے لیے اب تمام دستی (مینول) طلبی نوٹسز جاری کرنا بند کر دیا ہے۔

اب دفعہ 160 کے تحت جاری ہونے والے تمام طلبی نوٹسز صرف الیکٹرانک سسٹم کے ذریعے دئیے جائیں گے اور ہر نوٹس پر ایک منفرد اور قابل تصدیق کیو آر کوڈ درج ہوگا۔

ایف آئی اے نے کہا ہے کہ اگر کسی شہری کو دستی یا مشکوک نوٹس موصول ہو جس پر کیو آر کوڈ نہ ہو، تو اسے جعلی تصور کیا جائے۔

شہریوں سے اپیل کی گئی ہے کہ ایسے مشکوک نوٹسز کی فوری اطلاع complaints@fia.gov.pk
پر ای میل یا ہیلپ لائن 1991 پر دیں۔

ادارہ کا کہنا ہے کہ یہ اقدام شفافیت اور عوام کے اعتماد کو مزید مضبوط کرنے کے لیے اٹھایا گیا ہے۔