معروف بھارتی گلوکار المناک ٹریفک حادثے میں ہلاک

بھارت کے معروف پنجابی گلوکار ہرمن سدھو ایک المناک ٹریفک حادثے میں جاں بحق ہوگئے۔ بھارتی میڈیا کے مطابق 37 سالہ گلوکار کی گاڑی تیز رفتاری کے باعث ایک ٹرک سے ٹکرا گئی، جس کے نتیجے میں وہ موقع پر ہی ہلاک ہوگئے۔

اہل خانہ کے مطابق، سدھو کام کے بعد پٹیالہ سے اپنے گاؤں منسا واپس جا رہے تھے کہ اسی دوران گاڑی ٹرک سے ٹکرانے کے بعد مکمل تباہ ہوگئی۔ حادثے کی شدت اتنی زیادہ تھی کہ گلوکار کی لاش بھی ناقابل شناخت تھی۔

پولیس نے حادثے کے اسباب جاننے کے لیے تحقیقات شروع کردی ہیں۔ اسپتال میں ضابطے کی کارروائی کے دوران گلوکار کی شناخت دستاویزات کی مدد سے ممکن ہوئی۔ اہل خانہ نے بھی سدھو کی ہلاکت کی تصدیق کی ہے۔

ہرمن سدھو کی اچانک موت پر انڈسٹری اور مداح صدمے میں ہیں۔ مداحوں اور ساتھی فنکاروں نے اہل خانہ سے تعزیت کی اور سدھو کو ان کی خدمات پر خراج عقیدت پیش کیا۔

بھارتی میڈیا کے مطابق، ہرمن سدھو بھارتی پنجاب کے مشہور گلوکاروں میں شمار ہوتے تھے اور انہیں “پیر یا پیار” گانے سے شہرت ملی۔ ان کے ساتھیوں نے بتایا کہ سدھو تخلیقی صلاحیتوں کے مالک اور محنتی تھے، جس کی وجہ سے انہوں نے کم عمری میں ہی موسیقی کی دنیا میں اپنا نام بنایا تھا۔