سینئر وکلا اور ریٹائرڈ ججز کا 27ویں ترمیم پر چیف جسٹس کو اہم خط

اسلام آباد:ستائیسویں آئینی ترمیم کے معاملے پر سینیئر وکلا اور ریٹائرڈ ججز نے چیف جسٹس آف پاکستان کو خط لکھ کر اہم مطالبات کیے ہیں۔ خط میں فل کورٹ میٹنگ بلانے کی درخواست کی گئی ہے تاکہ سپریم کورٹ ترمیم پر اپنا مؤقف واضح کر سکے۔

خط پر جسٹس (ر) مشیر عالم، مخدوم علی خان، منیر اے ملک، عابد زبیری، جسٹس (ر) ندیم اختر، اکرم شیخ، انور منصور، علی احمد کرد، خواجہ احمد حسین اور صلاح الدین احمد کے دستخط شامل ہیں۔

خط میں کہا گیا ہے کہ بطور سپریم کورٹ ترمیم پر ردعمل دینا اور اپنا ان پٹ دینا سپریم کورٹ کا آئینی حق ہے۔ متن کے مطابق یہ خط غیر معمولی حالات میں لکھا گیا ہے کیونکہ سپریم کورٹ آج اپنے قیام کے بعد سب سے بڑے خطرے کا سامنا کر رہی ہے۔

سینیئر وکلا اور ریٹائرڈ ججز نے مزید کہا کہ ماضی میں کوئی سول یا فوجی حکومت سپریم کورٹ کو اپنا ماتحت ادارہ بنانے میں کامیاب نہیں ہوئی، اور اگر یہ پہلی کوشش ہے تو سپریم کورٹ کا یہ حق ہے کہ وہ اس پر ردعمل دے۔