معروف ادبی شخصیت ڈاکٹر عارفہ سیدہ زہرا انتقال کر گئیں

لاہور: معروف ادبی شخصیت ڈاکٹر عارفہ سیدہ زہرا انتقال کر گئیں۔

پاکستانی ڈراما نویس، مصنف اور شاعر اصغر ندیم سید نے ان کے انتقال کی تصدیق کرتے ہوئے گہرے دکھ اور افسوس کا اظہار کیا۔ انہوں نے بتایا کہ ڈاکٹر عارفہ سیدہ زہرا کا انتقال لاہور میں ہوا، جبکہ نماز جنازہ کے وقت کا اعلان بعد میں کیا جائے گا۔

ڈاکٹر عارفہ سیدہ زہرا نے ایم اے اردو کی تعلیم گورنمنٹ کالج لاہور سے حاصل کی، اور بعد ازاں ایسٹ ویسٹ سینٹر، یونیورسٹی آف ہوائی سے تاریخ میں ڈاکٹریٹ کی ڈگری حاصل کی۔

1986 سے 2009 تک وہ گورنمنٹ کالج فار ویمن، گلبرگ لاہور کی پرنسپل بھی رہیں۔

عارفہ سیدہ زہرا سات زبانوں پر عبور رکھتی تھیں اور تعلیمی، انتظامی، سماجی اور ثقافتی کمیٹیوں کی رُکن بھی رہ چکی ہیں۔