’’زین قریشی کوئی پُھوک مار دیں کہ وارنٹ ختم ہو جائیں‘‘:عدالت برہم

اسلام آباد:انسدادِ دہشت گردی عدالت اسلام آباد نے سنگجانی جلسہ کیس میں پی ٹی آئی رہنما زین قریشی کے ناقابلِ ضمانت وارنٹ گرفتاری جاری کر دیے ہیں۔

کیس کی سماعت اے ٹی سی جج طاہر عباس سپرا نے کی، جس میں پی ٹی آئی کے متعدد رہنماؤں کے خلاف مقدمات پر پیش رفت کا جائزہ لیا گیا۔

دورانِ سماعت عدالت کو بتایا گیا کہ زین قریشی مقدمے میں بارہا طلب کیے جانے کے باوجود پیش نہیں ہو رہے۔ جس پر عدالت نے سخت برہمی کا اظہار کرتے ہوئے کہا کہ “زین قریشی عرس میں شامل ہیں لیکن عدالت میں پیش نہیں ہوتے، اُن سے کہیں کہ کوئی پُھوک مار دے تاکہ عدالت وارنٹ ختم کر دے!”

جج طاہر عباس سپرا نے مزید طنزیہ ریمارکس دیتے ہوئے کہا:
“قریشی صاحب ایک کام کریں، یا درباروں پر مَل کر بیٹھ جائیں، تعویز دھاگا کریں یا پھر مکمل سیاست کریں — یا شاید ان کی سیاست مذہب کی بنیاد پر ہے؟”

عدالت نے کیس میں دیگر پی ٹی آئی رہنماؤں کے خلاف بھی کارروائی جاری رکھی۔ عمر ایوب اور زرتاج گل کے خلاف اشتہاری کارروائی کا آغاز کر دیا گیا، جبکہ علی بخاری کی حاضری سے استثنا کی درخواست منظور کر لی گئی۔

خیال رہے کہ پی ٹی آئی رہنماؤں کے خلاف یہ مقدمہ تھانہ سنگجانی میں درج کیا گیا تھا، جس میں جلسے کے دوران انتظامی احکامات کی خلاف ورزی اور اشتعال انگیزی کے الزامات شامل ہیں۔