پنجاب میں عمران خان کے خلاف کتنے مقدمات درج ہیں؟ تفصیلات پیش

لاہور:پنجاب میں چیئرمین پاکستان تحریکِ انصاف (پی ٹی آئی) عمران خان کے خلاف درج مقدمات کی تفصیلات عدالت کے روبرو پیش کر دی گئیں۔

لاہور ہائی کورٹ میں بانی چیئرمین پی ٹی آئی عمران خان کی وہ درخواست زیرِ سماعت آئی جس میں انہوں نے اپنے خلاف درج تمام مقدمات کو ایک ساتھ یکجا کرنے کی استدعا کی تھی۔

سماعت کے دوران عمران خان کی جانب سے کوئی وکیل عدالت میں پیش نہیں ہوا۔

چیف جسٹس عالیہ نیلم نے پنجاب حکومت کے نمائندہ وکیل سے استفسار کیا کہ درخواست گزار کے خلاف مجموعی طور پر کتنے مقدمات قائم کیے گئے ہیں۔

اس پر سرکاری وکیل نے عدالت کو آگاہ کیا کہ عمران خان کے خلاف پنجاب بھر میں 107 مقدمات درج ہیں۔

چونکہ عمران خان کی جانب سے کوئی وکیل عدالت میں موجود نہیں تھا، اس لیے عدالت نے درخواست کو عدم پیروی کی بنیاد پر خارج کر دیا۔

یاد رہے کہ بانی پی ٹی آئی نے یہ درخواست سال 2023ء میں دائر کی تھی، جس میں مؤقف اختیار کیا گیا تھا کہ پنجاب کے مختلف شہروں میں ان پر متعدد مقدمات قائم ہیں، اس لیے انہیں ایک ہی عدالت میں یکجا کر کے کارروائی کی جائے۔