عمران خان کو عدالت میں یا ویڈیو لنک کے ذریعے پیش کیا جائے،بڑا حکم

اسلام آباد:ڈسٹرکٹ اینڈ سیشن کورٹس اسلام آباد نے آئندہ سماعت پر بانی پاکستان تحریک انصاف عمران خان کو عدالت میں یا ویڈیو لنک کے ذریعے پیش کرنے کا حکم جاری کر دیا۔

ایڈیشنل ڈسٹرکٹ اینڈ سیشن جج محمد افضل مجوکا نے بانی پی ٹی آئی عمران خان اور ان کی اہلیہ بشریٰ بی بی کے خلاف 9 مئی کے واقعات سمیت دیگر پانچ مقدمات کی سماعت کی۔

اڈیالہ جیل انتظامیہ عدالت کی جانب سے بھیجے گئے شوکاز نوٹس کا جواب جمع نہیں کرا سکی۔

عدالت نے بانی پی ٹی آئی عمران خان اور بشریٰ بی بی کی عبوری ضمانت میں 25 نومبر تک توسیع کرتے ہوئے سماعت آئندہ تاریخ تک ملتوی کر دی۔

واضح رہے کہ عمران خان کے خلاف 9 مئی کے واقعات، اقدامِ قتل اور جعلی رسیدوں سمیت متعدد مقدمات درج ہیں، جب کہ بشریٰ بی بی پر مبینہ طور پر جعلی رسیدیں جمع کرانے کے الزام میں کیس دائر کیا گیا ہے۔