منشیات فروشوں سے ضبط کیا گیا سونا غزہ میں مدد کیلئے بھیجا جائے گا،کولمبیا

بوگوٹا:کولمبیا کے صدر گستاوو پیٹرو نے اعلان کیا ہے کہ منشیات کے اسمگلروں سے ضبط شدہ سونا اب غزہ کے متاثرہ فلسطینیوں کی مدد کے لیے بھیجا جائے گا۔

صدر پیٹرو نے سوشل میڈیا پر جاری اپنے بیان میں بتایا کہ یہ سونا جنگ سے متاثرہ فلسطینی بچوں کے علاج اور غزہ کی تعمیرِ نو میں استعمال کیا جائے گا۔ ان کے مطابق، یہ اقدام انسانیت، ہمدردی اور عالمی یکجہتی کی ایک نمایاں مثال ہے۔

صدر نے کہا کہ کولمبیا انسانی بنیادوں پر فلسطینی عوام کے ساتھ کھڑا ہے اور ان کی حکومت غزہ کی بحالی کے لیے عملی اقدامات اٹھا رہی ہے۔

انہوں نے مزید بتایا کہ وہ اقوامِ متحدہ میں ایک قرارداد پیش کریں گے، جس کے تحت غزہ کی تعمیرِ نو اور بحالی کے لیے ایک بین الاقوامی فورس تشکیل دینے کی تجویز دی جائے گی۔

یاد رہے کہ صدر گستاوو پیٹرو کو فلسطینیوں کے ایک پختہ حامی رہنما کے طور پر جانا جاتا ہے۔ وہ ماضی میں اسرائیلی فوجی کارروائیوں اور انسانی حقوق کی خلاف ورزیوں پر کھل کر تنقید کرتے رہے ہیں۔

واضح رہے کہ کولمبیا نے گزشتہ سال بھی درجنوں زخمی فلسطینی بچوں کو بوگوٹا کے اسپتالوں میں علاج کی سہولت فراہم کی تھی، جسے عالمی سطح پر انتہائی سراہا گیا تھا۔