News Wave 
71
راولپنڈی : ضلع اورکزئی میں سکیورٹی فورسز نے خفیہ اطلاعات کی بنیاد پر کارروائی کرتے ہوئے بھارتی حمایت یافتہ 19 خوارج کو ہلاک کر دیا، تاہم فائرنگ کے تبادلے میں لیفٹیننٹ کرنل اور میجر سمیت 11 اہلکار شہید ہو گئے۔
آئی ایس پی آر کے مطابق 7 اور 8 اکتوبر 2025 کی شب سکیورٹی فورسز نے ضلع اورکزئی میں ایک خفیہ آپریشن کیا، جہاں بھارتی سرپرستی میں متحرک فتنۃ الخوارج کی موجودگی کی اطلاع موصول ہوئی تھی۔
آپریشن کے دوران فورسز کی مؤثر اور بروقت کارروائی کے نتیجے میں 19 بھارتی حمایت یافتہ خوارج جان بحق ہوئے۔ تاہم شدتِ فائرنگ کے تبادلے میں لیفٹیننٹ کرنل جنید عارف اور ان کے نائب میجر طیب راحت نے بہادری کا مظاہرہ کرتے ہوئے جامِ شہادت نوش کیا۔
شہید لیفٹیننٹ کرنل جنید عارف راولپنڈی کے رہائشی تھے اور ان کی عمر 39 سال تھی، جبکہ نائب میجر طیب راحت بھی راولپنڈی کے رہائشی اور عمر 33 سال تھے۔
لیفٹیننٹ کرنل اور میجر کے علاوہ مزید 9 بہادر سپاہی بھی وطن پر قربان ہو گئے۔
شہداء میں نائب صوبیدار اعظم گل (خیبر)، نائیک عادل حسین (کرم)، نائیک گل امیر (ٹانک)، لانس نائیک شیر خان (مردان)، لانس نائیک طالش فراز (مانسہرہ)، لانس نائیک ارشاد حسین (کرم)، سپاہی طفیل خان (ملاکنڈ)، سپاہی عاقب علی (صوابی) اور سپاہی محمد زاہد (ٹانک) شامل ہیں۔
سکیورٹی فورسز نے علاقے میں کلیئرنس اور سینیٹائزیشن آپریشن جاری رکھا ہوا ہے تاکہ ممکنہ طور پر چھپے ہوئے کسی بھی دہشت گرد کو انجام تک پہنچایا جا سکے۔
آئی ایس پی آر نے کہا کہ پاکستان کی سکیورٹی فورسز بھارتی اسپانسرڈ دہشت گردی کے ناسور کو جڑ سے اکھاڑ پھینکنے کے عزم پر قائم ہیں اور ہمارے بہادر جوانوں کی ایسی قربانیاں اسی عزم کو مزید مضبوط کرتی ہیں۔
وزیراعظم و وزیر داخلہ کا پیغام
وزیراعظم محمد شہباز شریف نے ضلع اورکزئی میں سکیورٹی آپریشن میں بھارتی حمایت یافتہ فتنۃ الخوارج کے 19 دہشت گردوں کو ہلاک کرنے پر سکیورٹی فورسز کو خراج تحسین پیش کیا اور لیفٹیننٹ کرنل جنید عارف، میجر طیب راحت اور پاک فوج کے دیگر جرات مند سپاہیوں کی شہادت پر گہرہ دکھ و افسوس ظاہر کیا۔
انہوں نے شہداء کے لیے دعائے مغفرت اور لواحقین کے لیے صبر و استقامت کی دعا کی۔ وزیراعظم نے کہا کہ سکیورٹی فورسز کے نڈر جوانوں کی قربانیاں رائیگاں نہیں جائیں گی اور بھارتی حمایت یافتہ دہشت گردوں کے مذموم عزائم کو خاک میں ملایا جائے گا۔
وزیراعظم شہباز شریف نے مزید کہا کہ ملک کی سالمیت کو نقصان پہنچانے والے عناصر کو کامیاب نہیں ہونے دیا جائے گا اور حکومت دہشت گردی کے مکمل خاتمے کے لیے پرعزم ہے۔
وفاقی وزیر داخلہ محسن نقوی نے اورکزئی میں 19 بھارتی اسپانسرڈ دہشت گردوں کے خاتمے پر سکیورٹی فورسز کی ستائش کی اور بہادری سے مقابلے میں جامِ شہادت نوش کرنے والے لیفٹیننٹ کرنل جنید، میجر طیب اور 9 دیگر جوانوں کو خراجِ عقیدت پیش کیا۔
وزیر داخلہ محسن نقوی نے شہداء کے لواحقین سے دلی ہمدردی کا اظہار کیا اور زخمی ہونے والے دو جوانوں کی صحت یابی کے لیے دعا کی۔ ان کا کہنا تھا کہ لیفٹیننٹ کرنل جنید، میجر طیب اور دیگر شہداء نے اپنی قیمتی جانیں نچھاور کر کے بھارتی اسپانسرڈ دہشت گردوں کے ناپاک عزائم کو ناکام بنایا، اور یہ قربانیاں قوم کبھی فراموش نہیں کرے گی۔