جھوٹے پروپیگنڈے، جعلی خبریں، بیرونی مدد سے ہونے دہشتگردی پاکستان کو ترقی سے نہیں روک سکتیں:فیلڈ مارشل

کوئٹہ: فیلڈ مارشل سید عاصم منیر نے کہا ہے کہ پاکستان کی مسلح افواج عوام کی بھرپور حمایت کے ساتھ ملک سے دہشت گردی کے مکمل خاتمے کے لیے پوری طرح پرعزم ہیں۔ ان کا کہنا تھا کہ پاکستان کی ترقی کے سفر کو جھوٹے پروپیگنڈے، جعلی خبروں یا بیرونی سرپرستی میں ہونے والی دہشت گرد کارروائیوں کے ذریعے ہرگز روکا نہیں جا سکتا۔

آئی ایس پی آر کے مطابق فیلڈ مارشل سید عاصم منیر نے کوئٹہ گیریژن کا دورہ کیا، جہاں انہوں نے کمانڈ اینڈ اسٹاف کالج کوئٹہ میں زیرِ تربیت افسران اور فیکلٹی ارکان سے خطاب بھی کیا۔

اپنے خطاب میں انہوں نے ادارے کے تربیتی معیار کو سراہتے ہوئے کہا کہ یہاں سے فارغ التحصیل ہونے والے افسران اپنی پیشہ ورانہ مہارت اور شاندار کارکردگی کے باعث نمایاں مقام حاصل کرتے ہیں۔ انہوں نے کہا کہ جدید دور کے جنگی تقاضے تیزی سے بدل رہے ہیں، اس لیے افواج کو نئی ٹیکنالوجی، ملٹی ڈومین آپریشنز اور تینوں مسلح افواج کے باہمی تعاون کے ساتھ خود کو ہم آہنگ رکھنا ہوگا۔

فیلڈ مارشل نے اس بات پر زور دیا کہ افسران اور جوان مسلسل اپنی پیشہ ورانہ تربیت کو بہتر بنائیں تاکہ بدلتے ہوئے جنگی حالات میں مؤثر انداز میں فرائض انجام دے سکیں۔ انہوں نے بلوچستان میں تعینات مختلف فارمیشنز کے افسران اور جوانوں سے ملاقات بھی کی اور ان کے عزم اور پیشہ ورانہ تیاری کو سراہا۔

انہوں نے کہا کہ پاکستان کی مسلح افواج عوام کی حمایت کے ساتھ دہشت گردی کے مکمل خاتمے کے لیے ثابت قدم ہیں۔ ان کا کہنا تھا کہ ملک کی ترقی کا راستہ منفی پروپیگنڈے، جعلی خبروں یا بیرونی سرپرستی میں چلنے والی دہشت گردی سے نہیں روکا جا سکتا، اور ریاست کی مضبوطی اور عوامی اتحاد کے باعث تمام منفی کوششیں ناکام ہوں گی۔

فیلڈ مارشل عاصم منیر نے بلوچستان میں پائیدار امن و استحکام کو ناگزیر قرار دیتے ہوئے کہا کہ طویل المدتی ترقی کے لیے عوامی فلاح پر مبنی پالیسیاں، جامع ترقیاتی حکمت عملی اور بہتر طرزِ حکمرانی انتہائی اہم ہیں۔ انہوں نے حکومت بلوچستان کی جانب سے عوامی فلاح، سماجی و معاشی ترقی اور ریاست و عوام کے درمیان تعلقات کو مضبوط بنانے کے اقدامات کو بھی سراہا۔