News Wave 
ڈونلڈ ٹرمپ نے اعلان کیا ہے کہ بورڈ آف پیس سے وابستہ ممالک نے غزہ میں تعینات کی جانے والی انٹرنیشنل اسٹیبلائزیشن فورس کے لیے ہزاروں اہلکار فراہم کرنے کا وعدہ کیا ہے۔
انہوں نے اپنے سوشل میڈیا پلیٹ فارم ٹروتھ سوشل پر جاری بیان میں کہا کہ اس پیش رفت کا باضابطہ اعلان 19 فروری کو واشنگٹن میں ہونے والے بورڈ آف پیس کے اجلاس میں کیا جائے گا، جو ٹرمپ پیس انسٹیٹیوٹ آف پیس میں منعقد ہوگا۔
ٹرمپ کے مطابق رکن ممالک نے غزہ میں انسانی امداد اور تعمیرِ نو کے لیے پانچ ارب ڈالر سے زائد فنڈ فراہم کرنے کا عہد بھی کیا ہے۔ ان کا کہنا تھا کہ امن و امان برقرار رکھنے کے لیے ہزاروں اہلکار انٹرنیشنل اسٹیبلائزیشن فورس اور مقامی پولیس کے ساتھ تعینات کیے جائیں گے۔
انہوں نے اس بات پر زور دیا کہ حماس کو مکمل اور فوری طور پر غیر مسلح ہونے کے اپنے عزم پر قائم رہنا ہوگا۔ ان کے بقول بورڈ آف پیس مستقبل میں ایک مؤثر عالمی ادارہ ثابت ہوگا اور اس کی سربراہی کرنا ان کے لیے اعزاز کی بات ہے۔
دوسری جانب ترجمان دفتر خارجہ کے مطابق وزیر اعظم شہباز شریف بھی آئندہ اجلاس میں شریک ہوں گے اور ان کے ہمراہ نائب وزیر اعظم و وزیر خارجہ اسحاق ڈار بھی موجود ہوں گے۔
یاد رہے کہ اقوام متحدہ کی سلامتی کونسل کی قرارداد کے تحت جنگ بندی کے بعد غزہ میں بین الاقوامی استحکامی فورس کے قیام کی منظوری دی گئی تھی، جبکہ بورڈ آف پیس گزشتہ ماہ باضابطہ طور پر قائم کیا گیا تھا۔