نو مئی کیس، عمران خان نے عدالت میں حاضری کس طرح لگائی؟

انسداد دہشت گردی کی خصوصی عدالت راولپنڈی نے سانحہ 9 مئی کے 11 مقدمات کی سماعت 3 جنوری تک ملتوی کر دی ہے، جب کہ سابق وزیر اعظم اور تحریک انصاف کے بانی چیئرمین عمران خان نے اڈیالہ جیل سے روبکار حاضری لگائی۔

آج کی سماعت میں مقدمات کے چالان نقول تقسیم کرنے کا عمل مکمل نہیں ہو سکا، اور صرف محدود تعداد میں ملزمان عدالت میں پیش ہوئے۔ سابق وزیر داخلہ شیخ رشید احمد بھی عدالت پیش ہوئے، حاضری لگوائی اور واپس چلے گئے۔

ان 11 مقدمات میں جی ایچ کیو گیٹ 4 حملہ کیس، آرمی میوزیم پر حملہ، صدر میں حساس ادارے کی بلڈنگ جلنے، اور میٹرو بس اسٹیشن پر حملہ کیس بھی شامل ہیں۔ عدالت نے فیصلہ کیا کہ آئندہ سماعت پر چالان نقول کی تقسیم مکمل کی جائے اور فردِ جرم عائد کی جائے۔

عدالت نے تمام متعلقہ تھانوں کے تفتیشی افسران کو ہدایت دی ہے کہ وہ مکمل ریکارڈ کے ساتھ عدالت میں پیش ہوں۔ اس دوران سابق وزیر اعظم عمران خان اور سابق وزیر خارجہ شاہ محمود قریشی نے بھی جیل سے روبکار حاضری لگائی۔