پاکستانی نژاد امریکی نوجوان غیر قانونی اسلحہ رکھنے اور حملے کی منصوبہ بندی کے الزام میں گرفتار

امریکی ریاست ڈیلاویئر میں پاکستانی نژاد امریکی نوجوان کو غیر قانونی اسلحہ رکھنے اور مبینہ طور پر حملے کی منصوبہ بندی کے الزام میں گرفتار کر لیا گیا ہے۔ امریکی میڈیا کے مطابق 25 سالہ لقمان خان کی گرفتاری 24 نومبر کی رات اس وقت عمل میں آئی جب پولیس نے کینبی پارک ویسٹ کے علاقے میں ایک ٹرک کو روکا جس میں وہ موجود تھا۔

رپورٹس کے مطابق پولیس نے نوجوان کو گاڑی سے باہر نکلنے کے احکامات دیے لیکن اس نے مزاحمت کی، جس کے بعد اسے موقع پر ہی حراست میں لے لیا گیا۔ تلاشی کے دوران ٹرک سے ایک پستول، میگزین اور مبینہ منصوبہ بندی سے متعلق دستاویزات برآمد ہوئیں۔ ان دستاویزات میں یونیورسٹی آف ڈیلاویئر کے پولیس اسٹیشن کا تفصیلی خاکہ، داخلی و خارجی راستوں کی نشاندہی اور ایک پولیس افسر کا نام شامل تھا۔

گرفتاری کے ایک روز بعد، 25 نومبر کو ایف بی آئی نے ملزم کے گھر پر چھاپہ مارا جہاں سے مزید جدید اسلحہ تحویل میں لیا گیا۔ امریکی حکام کے مطابق لقمان خان یونیورسٹی آف ڈیلاویئر کا طالب علم اور پاکستانی نژاد امریکی شہری ہے، اور اس پر شبہ ہے کہ وہ یونیورسٹی کے پولیس ڈیپارٹمنٹ پر حملے کی منصوبہ بندی کر رہا تھا۔

حکام نے بتایا کہ ملزم پر غیر قانونی مشین گن رکھنے اور حملے کی منصوبہ بندی کے سنگین الزامات عائد کیے گئے ہیں۔ اسے 11 دسمبر کو عدالت میں پیش کیا جائے گا۔ حکام کے مطابق لقمان خان کا ماضی میں کوئی کریمنل ریکارڈ نہیں ہے۔