سسرال پہنچنے کے 20 منٹ بعد ہی دولہا، دولہن میں علیحدگی

اترپردیش: بھارت میں ایک دلہن نے سسرال پہنچنے کے صرف 20 منٹ بعد ہی شوہر کے ساتھ رہنے سے انکار کر دیا، جس کے نتیجے میں شادی باہمی رضامندی سے ختم کر دی گئی۔

بھارتی میڈیا کے مطابق یہ واقعہ اترپردیش کے دیوریا میں پیش آیا، جہاں نوجوان کی شادی سلیم پور نگر پنچائیت کی لڑکی سے دھوم دھام سے ہوئی اور تمام روایتی رسومات ادا کی گئیں۔ شادی کے بعد جب دلہن سسرال پہنچی، تو خاندان اور محلے کی خواتین نے روایتی چہرہ دکھانے کی تقریب شروع کی۔

رسومات کے دوران دلہن اچانک اٹھ گئی اور اپنے والدین کو بلانے کی درخواست کی۔ جب اس سے وجہ پوچھی گئی تو اس نے واضح کر دیا کہ وہ سسرال کے ساتھ نہیں رہے گی اور فوری طور پر اپنے میکے واپس جانا چاہتی ہے۔

شوہر اور سسرال والوں نے دلہن کو سمجھانے کی کوشش کی، لیکن وہ اپنے موقف پر قائم رہی۔ جلد ہی دلہن کے گھر والے بھی پہنچ گئے، لیکن دلہن نے سسرال کے رویے کو بنیاد بنا کر اپنے فیصلے سے پیچھے ہٹنے سے انکار کیا۔

کشیدگی بڑھنے پر پنچائیت بلائی گئی، جو تقریباً پانچ گھنٹے جاری رہی۔ بالآخر دونوں خاندانوں نے باہمی رضامندی سے شادی ختم کرنے پر اتفاق کیا اور دلہن اپنے اہل خانہ کے ساتھ روانہ ہو گئی۔

پولیس کا کہنا ہے کہ واقعہ ہمارے نوٹس میں آیا، لیکن کسی نے کوئی شکایت درج نہیں کرائی اور پنچائیت میں باہمی رضامندی سے دولہا اور دلہن الگ ہو گئے۔