News Wave 
ریاض:سعودی عرب نے فلسطینی خزانے کی معاونت کے لیے 90 ملین ڈالر کی نئی مالی گرانٹ فراہم کر دی ہے۔ یہ رقم عمان میں سعودی سفارتخانے میں منعقد ایک ملاقات کے دوران وزیرِ منصوبہ بندی و بین الاقوامی تعاون اسطفان سلامہ نے سعودی عرب کے اردن میں سفیر اور ریاستِ فلسطین کے غیر مقیم کمشنر شہزادہ منصور بن خالد بن فرحان آل سعود سے وصول کی۔
سعودی عرب کی یہ امداد 2025 میں فلسطینی اتھارٹی کی مسلسل مالی مدد کے سلسلے کی ایک کڑی ہے۔
فلسطینی نائب صدر حسین الشیخ نے اپنے بیان میں کہا کہ مشکل معاشی صورتحال میں سعودی گرانٹ فلسطینی مالی استحکام کو مضبوط بنانے میں اہم کردار ادا کرے گی۔ انہوں نے فلسطینی حقوق کے لیے سعودی عرب کے مستقل اور مضبوط مؤقف کی بھی تعریف کی۔
اردن میں سعودی سفیر شہزادہ منصور بن خالد نے کہا کہ سعودی عرب ہمیشہ کی طرح فلسطینی عوام کے جائز حقوق اور آزاد ریاست کے قیام کی حمایت پر قائم ہے۔ ان کا مزید کہنا تھا کہ یہ گرانٹ فلسطینی حکومت کو اپنی ذمہ داریاں بہتر انداز میں ادا کرنے میں مدد دے گی اور صحت، تعلیم سمیت اہم شعبوں میں عوام کے مسائل کم کرنے میں معاون ثابت ہوگی۔