پیٹرول کی قیمت میں کمی کے بعد عوام کے لیے ایک اور خوشخبری

اسلام آباد:پیٹرول کی قیمت میں کمی کے بعد عوام کے لیے ایک اور خوشخبری سامنے آگئی ہے۔

حکومت نے گزشتہ شب آئندہ 15 روز کے لیے پیٹرولیم مصنوعات کے نرخوں میں کمی کا اعلان کیا تھا، جس کے تحت پیٹرول اور ہائی اسپیڈ ڈیزل کی قیمتیں کم کی گئی تھیں۔

آج حکومت نے لائٹ ڈیزل آئل اور مٹی کے تیل کی قیمتوں میں بھی کمی کا اعلان کر دیا ہے۔ حکومتی نوٹیفکیشن کے مطابق لائٹ ڈیزل آئل 7 روپے 3 پیسے فی لیٹر سستا ہوگیا ہے، جبکہ مٹی کے تیل کی قیمت میں ایک روپے 48 پیسے فی لیٹر کمی کی گئی ہے۔

اس حوالے سے اوگرا کی جانب سے قیمتوں میں کمی کا باضابطہ نوٹیفکیشن جاری کر دیا گیا ہے۔

قیمتوں میں کمی کے بعد لائٹ ڈیزل آئل کی نئی قیمت 163 روپے 77 پیسے فی لیٹر جبکہ مٹی کے تیل کی نئی قیمت 192 روپے 86 پیسے فی لیٹر مقرر کی گئی ہے۔