وفاقی آئینی عدالت کا چاروں صوبوں میں رجسٹریاں قائم کرنے کا فیصلہ

وفاقی آئینی عدالت نے ملک بھر میں عوام کو مؤثر اور فوری انصاف کی فراہمی کے لیے ایک اہم قدم اٹھاتے ہوئے چاروں صوبوں میں اپنی رجسٹریاں قائم کرنے کا فیصلہ کرلیا ہے۔ اس کے ساتھ ساتھ عدالت نے ویڈیو لنک کے ذریعے سماعت کی سہولت فراہم کرنے کا بھی اصولی فیصلہ کرلیا ہے، تاکہ دور دراز علاقوں کے شہریوں کو عدالت تک رسائی آسان بنائی جا سکے۔

رپورٹ کے مطابق سماعت کے دوران چیف جسٹس عامر فاروق نے ریمارکس دیے کہ عدالت اس وقت ٹرانزیشن کے مرحلے سے گزر رہی ہے، اور اس عمل کو مؤثر بنانے کے لیے صوبائی سطح پر رجسٹریاں قائم کی جائیں گی۔ انہوں نے کہا کہ پرنسپل سیٹ کو تمام رجسٹریوں کے ساتھ ویڈیو لنک کے ذریعے منسلک کیا جائے گا، جس سے مقدمات کی سماعت میں سہولت اور رفتار میں اضافہ ہوگا۔

سردیوں کی تعطیلات کا اعلان

وفاقی آئینی عدالت نے سردیوں کی سالانہ تعطیلات کا بھی اعلان کردیا ہے۔ جاری کردہ نوٹیفکیشن کے مطابق عدالت 22 دسمبر 2025 سے 4 جنوری 2026 تک بند رہے گی، تاہم ارجنٹ نوعیت کے مقدمات کی سماعت تعطیلات کے دوران بھی جاری رہے گی۔

نوٹیفکیشن میں واضح کیا گیا ہے کہ تعطیلات کے باوجود عدالت کے دفاتر کھلے رہیں گے، اور ضروری نوعیت کے فکس مقدمات کی سماعت بلا تعطل جاری رکھی جائے گی۔ عدالت معمول کے مطابق 5 جنوری 2026 کو دوبارہ کام شروع کرے گی۔