کالعدم ٹی ایل پی کی تمام جائیدادیں اور اثاثے منجمد کرنے کے احکامات جاری

لاہور:پنجاب حکومت نے کالعدم تحریک لبیک پاکستان (ٹی ایل پی) کی تمام جائیدادیں اور اثاثے منجمد کرنے کے احکامات جاری کر دیے ہیں۔ یہ احکامات محکمہ داخلہ پنجاب کی جانب سے صوبے بھر کے انتظامی حکام کو بھیج دیے گئے ہیں۔

ذرائع کے مطابق صوبے کے تمام اضلاع میں ٹی ایل پی کے نام پر موجود جائیدادوں اور اثاثوں کی تفصیلات جمع کر کے رپورٹ محکمہ داخلہ پنجاب کو ارسال کی جائے گی۔ اس فیصلے کی منظوری چیئرمین سب کیبنٹ کمیٹی خواجہ سلمان رفیق کی سربراہی میں ہونے والے اجلاس میں دی گئی۔

محکمہ داخلہ پنجاب کے سیکرٹری ڈاکٹر احمد جاوید قاضی نے تمام کمشنرز اور ڈپٹی کمشنرز کو ہدایت کی ہے کہ وہ فوری طور پر کارروائی کرتے ہوئے اثاثوں کی نشاندہی اور منجمد کرنے کا عمل مکمل کریں۔ اس حوالے سے بورڈ آف ریونیو، سیکرٹری ہاؤسنگ، سیکرٹری کوآپریٹو اور دیگر متعلقہ محکموں کو بھی باضابطہ مراسلے جاری کیے گئے ہیں۔

واضح رہے کہ تحریک لبیک پاکستان کو انسدادِ دہشت گردی ایکٹ کے تحت کالعدم قرار دیا گیا تھا، جس کے بعد اس کے مالی و تنظیمی اثاثوں پر قانونی پابندیاں عائد کی جا چکی ہیں۔