ہر امریکی شہری کو 2 ہزار ڈالر ملیں گے، ٹرمپ کا بڑا اعلان

واشنگٹن: امریکی صدر ڈونلڈ ٹرمپ نے ایک اہم اعلان کرتے ہوئے کہا ہے کہ امریکا کو تجارتی محصولات (ٹیرف) سے حاصل ہونے والی اضافی آمدن کا بڑا حصہ شہریوں میں ڈیویڈنڈ کی صورت میں تقسیم کیا جائے گا۔

ٹرمپ نے اتوار کے روز اپنے سوشل میڈیا پلیٹ فارم ٹروتھ سوشل (Truth Social) پر ایک پوسٹ میں بتایا کہ ہر امریکی شہری کو کم از کم 2 ہزار ڈالر ادا کیے جائیں گے، تاہم زیادہ آمدن والے افراد اس اسکیم سے مستفید نہیں ہو سکیں گے۔

امریکی صدر نے اپنی پوسٹ میں مزید کہا: “ہم کھربوں ڈالر کی آمدن حاصل کر رہے ہیں، اور جلد ہی 37 کھرب ڈالر کے قرضوں کی ادائیگی کا آغاز کریں گے۔ ہر شہری کو (زیادہ آمدن والے افراد کے سوا) کم از کم 2 ہزار ڈالر دیے جائیں گے۔”

دوسری جانب، غیر ملکی میڈیا کے مطابق، امریکی سپریم کورٹ اس وقت ٹرمپ کی تجارتی ٹیرف پالیسی کے قانونی جواز کا تفصیلی جائزہ لے رہی ہے۔ اس سے قبل متعدد ماتحت عدالتیں بعض محصولات کو غیر قانونی قرار دے چکی ہیں۔

واضح رہے کہ گزشتہ اکتوبر میں ٹرمپ نے ایک انٹرویو کے دوران عوام کو 1 سے 2 ہزار ڈالر دینے کی تجویز دی تھی۔ ان کا کہنا تھا کہ ان کی نافذ کردہ محصولات سے امریکا کو سالانہ ایک کھرب ڈالر سے زائد آمدنی حاصل ہو سکتی ہے۔

تجزیہ کاروں کے مطابق، ٹرمپ کا یہ اعلان امریکی معیشت میں سیاسی اور معاشی ہلچل پیدا کر سکتا ہے، کیونکہ یہ نہ صرف عام شہریوں کے لیے ریلیف اسکیم ہے بلکہ ممکنہ طور پر آئندہ انتخابات سے قبل عوامی حمایت حاصل کرنے کی ایک حکمتِ عملی بھی ہو سکتی ہے۔