واشنگٹن نے غزہ میں عالمی فوج بھیجنے کیلئے یو این کو قرارداد بھجوا دی

واشنگٹن:امریکا نے اقوام متحدہ کی سلامتی کونسل سے مطالبہ کیا ہے کہ غزہ میں ایک بین الاقوامی سیکیورٹی فورس (ISF) کے قیام کی منظوری دی جائے، جو ابتدائی طور پر دو سال کے لیے وہاں تعینات رہے گی۔

امریکی ویب سائٹ ایکسِیوس (Axios) کے مطابق، امریکا نے یو این ایس سی کے رکن ممالک کو ایک ڈرافٹ قرارداد بھیج دی ہے، جس میں اس فورس کے اختیارات، ذمہ داریاں اور قیام سے متعلق تفصیلات شامل ہیں۔

رپورٹ کے مطابق، یہ فورس غزہ بورڈ آف پیس کی مشاورت سے تشکیل دی جائے گی، جس کی صدارت امریکی صدر ڈونلڈ ٹرمپ خود کریں گے۔

ڈرافٹ میں بتایا گیا ہے کہ بین الاقوامی سیکیورٹی فورس کو غزہ کی سرحدی سلامتی برقرار رکھنے، عام شہریوں اور امدادی قافلوں کے تحفظ، فلسطینی پولیس کی تربیت اور علاقے کو غیر عسکری بنانے کی ذمہ داریاں سونپی جائیں گی۔

دستاویز کے مطابق، فورس کو اختیار حاصل ہوگا کہ وہ اپنے مینڈیٹ کی تکمیل کے لیے بین الاقوامی قوانین کے تحت تمام ضروری اقدامات اٹھا سکے۔

رپورٹ میں مزید بتایا گیا ہے کہ ISF کوئی امن مشن نہیں بلکہ ایک نفاذی فورس ہوگی۔ اس کا بنیادی مقصد غزہ میں عبوری سیکیورٹی فراہم کرنا ہے تاکہ اسرائیل مرحلہ وار انخلا کر سکے اور اس کے بعد فلسطینی اتھارٹی اصلاحات مکمل ہونے پر انتظامی کنٹرول سنبھال سکے۔

قرارداد میں یہ تجویز بھی شامل ہے کہ غزہ کی سول انتظامیہ ایک غیر سیاسی تکنوکریٹ کمیٹی کے ذریعے چلائی جائے گی، جب کہ انسانی امداد کی ترسیل اقوام متحدہ، ریڈ کراس اور ریڈ کریسنٹ کے ذریعے انجام دی جائے گی۔