سونے کے خریداروں کیلئے خوشخبری! قیمتوں میں مسلسل کمی کا سلسلہ جاری

کراچی:عالمی اور مقامی مارکیٹوں میں سونے کی قیمتوں میں مسلسل کمی کا سلسلہ جاری ہے، جس کے باعث جمعہ کے روز قیمتی دھات مزید سستی ہوگئی۔

بین الاقوامی بلین مارکیٹ میں آج فی اونس سونے کی قیمت میں 20 ڈالر کی نمایاں کمی ریکارڈ کی گئی، جس کے بعد عالمی سطح پر سونا 4 ہزار 95 ڈالر فی اونس پر آ گیا۔

عالمی مارکیٹ کے اثرات کے تحت مقامی صرافہ بازاروں میں بھی سونے کی قیمتوں میں نمایاں کمی دیکھی گئی۔ 24 قیراط سونا 2 ہزار روپے سستا ہو کر 4 لاکھ 31 ہزار 862 روپے فی تولہ کی سطح پر پہنچ گیا۔

اسی طرح فی 10 گرام سونے کی قیمت میں بھی 1 ہزار 714 روپے کی کمی ریکارڈ کی گئی، جس کے بعد نئی قیمت 3 لاکھ 70 ہزار 252 روپے فی 10 گرام ہو گئی۔

چاندی کی قیمتوں میں بھی کمی کا رجحان برقرار رہا۔ ملک بھر میں فی تولہ چاندی 43 روپے سستی ہو کر 5 ہزار 67 روپے جبکہ فی 10 گرام چاندی 37 روپے کمی کے بعد 4 ہزار 344 روپے کی سطح پر پہنچ گئی۔

یاد رہے کہ گزشتہ روز بھی سونا سستا ہوا تھا، جب بین الاقوامی مارکیٹ میں فی اونس قیمت میں 35 ڈالر اور مقامی سطح پر فی تولہ 3 ہزار 500 روپے کی کمی ریکارڈ کی گئی تھی۔