تکنیکی غلطی، سینیٹ سے 27ویں آئینی ترمیم کی کل دوبارہ منظوری لی جائے گی

اسلام آباد: اسپیکر قومی اسمبلی سردار ایاز صادق کی سربراہی میں قومی اسمبلی کا اجلاس شروع ہو گیا ہے، جس میں آج 27ویں آئینی ترمیم مختلف ترامیم کے ساتھ منظور ہونے کا امکان ہے۔

ذرائع کے مطابق، سینیٹ میں 27ویں آئینی ترمیم میں تکنیکی غلطی رہ گئی تھی، جس کی تصحیح کے بعد یہ ترمیم قومی اسمبلی سے منظور ہونے کے بعد دوبارہ سینیٹ میں بھیجی جا سکتی ہے۔ امکان ہے کہ کل سینیٹ سے 27ویں آئینی ترمیم کی دوبارہ منظوری لی جائے گی۔

یاد رہے کہ دو روز قبل سینیٹ نے 27ویں آئینی ترمیم دو تہائی اکثریت سے منظور کی تھی۔ اس ترمیم کے تحت ملک میں ایک آئینی عدالت قائم کی جائے گی، جس میں تمام ہائیکورٹس کے ججز شامل ہوں گے۔ علاوہ ازیں، صدر پاکستان کو تاحیات استثنیٰ حاصل ہوگا، اور آرمی چیف کے عہدے کو ختم کر کے چیف آف ڈیفنس فورسز کا نیا عہدہ تشکیل دیا جائے گا۔

گزشتہ روز وفاقی وزیر قانون اعظم نذیر تارڑ نے 27ویں آئینی ترمیم قومی اسمبلی میں پیش کی تھی، جس پر حکومت اور اپوزیشن اراکین نے بحث بھی کی۔