News Wave 
راولپنڈی:26 نومبر کے احتجاج سے متعلق درج مقدمے میں انسدادِ دہشت گردی عدالت راولپنڈی نے علیمہ خان کے ضامن کی جائیداد بحقِ سرکار قرق کرنے کا حکم جاری کر دیا۔
ای ٹی سی کے جج امجد علی شاہ نے کیس کی سماعت کی۔ عدالت سے وارنٹِ گرفتاری جاری ہونے کے باوجود علیمہ خان پیش نہ ہوئیں۔
عدالت نے عدم پیشی پر ڈی جی نادرا کو ہدایت دی کہ علیمہ خان کا قومی شناختی کارڈ بلاک کیا جائے جبکہ گورنر اسٹیٹ بینک کو ان کے تمام بینک اکاؤنٹس منجمد کرنے کا حکم دیا۔ ساتھ ہی عدالت نے یہ بھی حکم دیا کہ علیمہ خان کا پاسپورٹ بلاک کر دیا جائے۔
سماعت کے دوران عدالت نے سخت ریمارکس دیتے ہوئے کہا کہ ملزمہ ہر جگہ نظر آتی ہے مگر عدالت میں پیش نہیں ہوتی، اب ان کی حاضری ہر صورت یقینی بنائی جائے گی۔
کیس کی سماعت 27 اکتوبر تک ملتوی کر دی گئی۔
ادھر لاہور میں پانچ اکتوبر کے پی ٹی آئی احتجاج کے دوران پولیس پر حملے سے متعلق کیس میں انسدادِ دہشت گردی عدالت نے بانی پی ٹی آئی کی بہن علیمہ خان اور بھانجے شیر شاہ کی عبوری ضمانت میں توسیع کر دی۔
انسدادِ دہشت گردی عدالت لاہور کے جج منظر علی گل نے مقدمے کی سماعت کی۔ عظمیٰ خان کی ایک روزہ حاضری سے استثنیٰ کی درخواست منظور کر لی گئی۔
ملزمان اپنی عبوری ضمانت کی مدت ختم ہونے پر عدالت کے روبرو پیش ہوئے۔
دورانِ سماعت، پراسیکیوٹر نے عدالت کو بتایا کہ مقدمے کا ریکارڈ فی الحال دستیاب نہیں، لہٰذا سماعت کے لیے نئی تاریخ دی جائے۔
عدالت نے مقدمے کی مزید کارروائی 5 دسمبر تک ملتوی کر دی۔