پانی کی شدید قلت کے شکار بلوچستان کیلئے بڑی خوشخبری

ایشیائی ترقیاتی بینک (اے ڈی بی) نے پاکستان کے لیے مزید 4 کروڑ 80 لاکھ ڈالر کی فنانسنگ کی منظوری دے دی ہے۔

اے ڈی بی کے جاری کردہ بیان کے مطابق یہ رقم صوبہ بلوچستان میں پانی سے متعلق ایک اہم منصوبے پر خرچ کی جائے گی۔ اس منصوبے کے تحت جدید پائپ لائن سسٹم متعارف کرایا جائے گا جس سے پانی کا ضیاع کم ہوگا اور لوگوں کو صاف پانی کی بہتر فراہمی ممکن ہو سکے گی۔

بلوچستان میں پانی کی کمی اور موسمیاتی تبدیلیوں نے زرعی شعبے کو سخت متاثر کیا ہوا ہے۔ صوبے کی معیشت کا دو تہائی حصہ زراعت پر قائم ہے، اور تقریباً 60 فیصد آبادی کا روزگار بھی اسی شعبے سے وابستہ ہے۔

اے ڈی بی کے مطابق منصوبے سے 1 ہزار 839 ہیکٹر بارانی زمین پر بھی پانی کی دستیابی بہتر ہو جائے گی۔ اس کے علاوہ ژوب اور مُولا دریاؤں کے بیسن میں روزگار کے نئے مواقع پیدا ہوں گے اور خواتین کے لیے بھی معاشی سرگرمیوں میں حصہ لینے کے بہتر مواقع ملیں گے۔

منصوبے میں جاپان فنڈ اور ہائی لیول ٹیکنالوجی فنڈ کی شراکت بھی شامل ہے۔