خواتین کی سگریٹ نوشی پر ثروت گیلانی کا نیا موقف سوشل میڈیا پر تیزی سے وائرل

کراچی :معروف اداکارہ ثروت گیلانی نے واضح کیا ہے کہ فلموں یا ویب سیریز میں خواتین کی سگریٹ نوشی کو آزادی یا خودمختاری کی علامت سمجھنا سراسر غلط تاثر ہے۔ ان کے مطابق، ایسے مناظر دراصل کردار کی نفسیات اور کہانی کے تقاضے پورے کرنے کے لیے شامل کیے جاتے ہیں، نہ کہ انہیں طاقت یا آزادی کے مظہر کے طور پر پیش کیا جاتا ہے۔

ایک حالیہ انٹرویو میں ثروت گیلانی نے کہا کہ بعض خواتین حقیقی زندگی میں بھی سگریٹ نوشی کرتی ہیں، اور یہی وجہ ہے کہ اس حقیقت کو بعض اوقات کہانیوں میں شامل کیا جاتا ہے تاکہ کردار زیادہ حقیقی اور قابلِ یقین محسوس ہوں۔ تاہم ان کا کہنا تھا کہ “سگریٹ نوشی کو خواتین کی خودمختاری یا طاقت کے ساتھ جوڑنا غیر حقیقی اور غیر ضروری سوچ ہے۔”

اداکارہ نے اس موقع پر روایتی ٹی وی ڈراموں اور ڈیجیٹل پلیٹ فارمز پر بننے والی ویب سیریز کے کام کے انداز میں فرق پر بھی روشنی ڈالی۔ ان کے مطابق، ڈیجیٹل میڈیا پر کام کی رفتار تیز ہوتی ہے، جہاں اداکار کو کم وقت میں زیادہ اثر پیدا کرنا ہوتا ہے، جبکہ ٹی وی ڈراموں میں اداکار کو منظر کے جذبات کو ابھارنے کے لیے زیادہ وقت اور گنجائش ملتی ہے۔

ثروت گیلانی نے مزید کہا کہ وہ اپنے کام کے ذریعے خواتین کے حقیقی مسائل، ان پر ہونے والے سماجی دباؤ اور معاشرتی تضادات کو سامنے لانا چاہتی ہیں تاکہ ناظرین نہ صرف سوچنے پر مجبور ہوں بلکہ سماجی رویوں میں مثبت تبدیلی بھی آئے۔