جیل کی دیواروں نے عمران خان کو ذہنی طور پر مفلوج کر دیا، عظمیٰ بخاری

لاہور: صوبائی وزیر اطلاعات پنجاب عظمیٰ بخاری نے کہا ہے کہ بانی پاکستان تحریک انصاف عمران خان کو جیل کی دیواروں نے ذہنی طور پر مفلوج کر دیا ہے۔

اپنے بیان میں عظمیٰ بخاری نے کہا کہ عمران خان اپنے دورِ حکومت میں بیک وقت جلاد اور فرعون کا کردار ادا کر رہے تھے۔ انہوں نے اس مذہبی جماعت کو، جسے وہ ماضی میں دہشت گرد اور شدت پسند قرار دیتے تھے، اب اپنے پارٹی کارکنوں کو اسی جماعت کے حق میں احتجاج کی کال دینے کی ہدایت کر دی ہے۔

صوبائی وزیر اطلاعات نے کہا کہ عمران خان کی سیاست کا محور یوٹرن اور موقف میں بار بار تبدیلی ہے، مگر افسوس کہ ان میں اس پر شرم کا احساس تک نہیں۔ ان کی نام نہاد “فائنل کال” کو عوام پہلے ہی مسترد کر چکے ہیں، اب سوال یہ ہے کہ وہ دوبارہ کن مقاصد کے لیے کال دے رہے ہیں؟

عظمیٰ بخاری نے مزید کہا کہ اب عوام سوچنے پر مجبور ہیں کہ کیا انتشار پھیلانے کے لیے عمران خان اور مذہبی جماعت کا ایجنڈا ایک ہے؟

ان کا کہنا تھا کہ جس صوبے میں تحریک انصاف کی حکومت ہے، وہاں دہشت گردی عروج پر ہے، خیبر پختونخوا بیڈ گورننس، کرپشن اور دہشت گردی کا مرکز بن چکا ہے۔

انہوں نے کہا کہ تحریک انصاف کے پاس عوامی خدمت یا گورننس کے بجائے صرف انتشار پھیلانے اور حکومتیں گرانے کا ایجنڈا رہ گیا ہے۔ بطور جماعت ان کی پالیسی ڈلیور نہیں بلکہ انتشار پیدا کرنا ہے۔