عمران خان سے ملاقات میں رکاوٹ بننے والوں کیلئے سہیل آفریدی کااہم پیغام

پشاور: خیبر پختونخوا کے نومنتخب وزیراعلیٰ سہیل آفریدی نے کہا ہے کہ جو لوگ عمران خان سے ملاقات نہیں ہونے دے رہے، انہیں یہ احساس کرنا چاہیے کہ میں صوبے کا وزیراعلیٰ ہوں۔

پشاور ہائی کورٹ آمد کے موقع پر میڈیا سے گفتگو کرتے ہوئے وزیراعلیٰ سہیل آفریدی نے کہا کہ وہ بانی چیئرمین پی ٹی آئی عمران خان سے ملاقات کے لیے جا رہے ہیں، اور کوشش کریں گے کہ ملاقات ضرور ہو۔

ان کا کہنا تھا کہ میں کروڑوں عوام کی نمائندگی کرتا ہوں، اس لیے ملاقات میں رکاوٹ ڈالنے والوں کو سمجھنا چاہیے کہ یہ عوامی مینڈیٹ کی توہین ہے۔

سہیل آفریدی نے کہا کہ میڈیا میں گردش کرنے والی کابینہ کی فہرست جعلی ہے، اصل کابینہ کا فیصلہ عمران خان سے مشاورت کے بعد کیا جائے گا۔

قبل ازیں وزیراعلیٰ خیبر پختونخوا پشاور ہائی کورٹ پہنچے جہاں انہوں نے حفاظتی ضمانت کے لیے درخواست دائر کی۔ درخواست پر جسٹس اعجاز انور اور جسٹس نعیم انور پر مشتمل دو رکنی بینچ نے سماعت کی۔

عدالت نے وزیراعلیٰ سہیل آفریدی کو حفاظتی ضمانت دیتے ہوئے پولیس کو ان کی گرفتاری سے روک دیا۔

سماعت کے دوران جسٹس اعجاز انور نے ریمارکس دیے کہ درخواست گزار کے خلاف ایف آئی آر درج ہے؟

جس پر ایڈووکیٹ جنرل نے جواب دیا کہ “ہمیں تو معلوم ہی نہیں کہ کتنی ایف آئی آرز ہیں، ممکن ہے میرے خلاف بھی کوئی ایف آئی آر ہو۔”