عوام پر ایک اور بوجھ، ایل این جی 28 فیصد تک مہنگی

اسلام آباد:عوام پر ایک اور مالی دباؤ کا اضافہ کرتے ہوئے آئل اینڈ گیس ریگولیٹری اتھارٹی (اوگرا) نے مئی کے لیے ایل این جی کی قیمتوں میں نمایاں اضافہ کر دیا ہے، جس کے بعد مجموعی طور پر نرخوں میں 28 فیصد تک کا اضافہ سامنے آیا ہے۔

جاری کردہ نوٹیفکیشن کے مطابق سوئی سدرن گیس کمپنی کے لیے ایل این جی 3.51 ڈالر فی ایم ایم بی ٹی یو مہنگی کی گئی ہے۔ اس اضافے کے بعد سوئی سدرن کے لیے نئی قیمت 16.04 ڈالر فی ایم ایم بی ٹی یو مقرر ہو گئی ہے۔

اسی طرح سوئی ناردرن گیس نیٹ ورک کے صارفین کے لیے بھی قیمتوں میں اضافہ کیا گیا ہے، جہاں فی ایم ایم بی ٹی یو نرخ میں 3.43 ڈالر کا اضافہ ہوا ہے۔ اس تبدیلی کے بعد سوئی ناردرن کے نظام کے تحت ایل این جی کی نئی قیمت 16.98 ڈالر فی ایم ایم بی ٹی یو طے کی گئی ہے۔

ذرائع کے مطابق قیمتوں کے تعین کے عمل میں اوگرا کی جانب سے تاخیر کی وجہ سے مئی کی قیمتوں کا اعلان معمول سے ہٹ کر دیر سے کیا گیا، جس کے باعث مجموعی نظام میں غیر معمولی تاخیر بھی دیکھنے میں آئی۔