اسلام آباد ہائیکورٹ نے بانی پی ٹی آئی کی نجی ہسپتال منتقلی کی درخواست پر محفوظ فیصلہ سنادیا

اسلام آباد:اسلام آباد ہائیکورٹ نے بانی پی ٹی آئی کی نجی ہسپتال منتقل کی درخواست نمٹا دی

عدالت نے اپنے حکم میں کہا ہے کہ بانی پی ٹی آئی کا مکمل طبی معائنہ کرانے کے لیے ماہر ڈاکٹروں پر مشتمل میڈیکل بورڈ بنایا جائے۔ عدالت نے واضح کیا کہ اس بورڈ میں معروف معالج ڈاکٹر عارف اور ڈاکٹر ندیم قریشی کو بھی شامل کیا جائے تاکہ طبی معائنے کا عمل شفاف اور جامع انداز میں مکمل ہو سکے۔

اسلام آباد ہائیکورٹ نے مزید ہدایت کی کہ جیل رولز کے مطابق بانی پی ٹی آئی کی صحت سے متعلق تمام صورتحال سے ان کے اہل خانہ کو باقاعدگی سے آگاہ رکھا جائے۔ عدالت کے حکم کے مطابق ڈاکٹر ندیم قریشی اس حوالے سے خاندان کے ساتھ رابطے میں رہیں گے اور طبی معائنے کی پیش رفت سے آگاہ کرتے رہیں گے۔

عدالت نے اپنے فیصلے میں یہ بھی کہا کہ پہلے سے قائم لارجر بینچ کے احکامات کے مطابق بانی پی ٹی آئی سے ان کے وکلا اور اہل خانہ کی ملاقات کو بھی یقینی بنایا جائے۔ عدالت نے متعلقہ حکام کو ہدایت کی کہ ملاقاتوں کے حوالے سے تمام قانونی تقاضے پورے کرتے ہوئے سہولت فراہم کی جائے۔

اسلام آباد ہائیکورٹ کے اس حکم کو بانی پی ٹی آئی کی صحت اور قانونی حقوق کے حوالے سے ایک اہم پیش رفت قرار دیا جا رہا ہے، جس کے تحت نہ صرف طبی معائنہ یقینی بنایا جائے گا بلکہ اہل خانہ اور وکلا سے ملاقات کے حق کو بھی برقرار رکھا جائے گا۔