امریکا میں گرفتار لقمان خان پاکستانی نہیں، افغان شہری ہے:پاکستان

اسلام آباد:امریکا میں غیر قانونی اسلحہ رکھنے اور حملے کی منصوبہ بندی کے الزام میں ایک نوجوان کی گرفتاری کے معاملے پر پاکستان کے دفترِ خارجہ نے باضابطہ ردعمل جاری کر دیا ہے۔

ترجمان دفتر خارجہ طاہر اندرابی نے بیان میں واضح کیا کہ امریکا میں گرفتار ہونے والا لقمان خان پاکستانی شہری نہیں بلکہ افغان نژاد ہے۔ ان کے مطابق تحقیقات سے ثابت ہوا ہے کہ ملزم افغان شہری ہے، جو ماضی میں مہاجر کے طور پر کچھ عرصہ پاکستان میں مقیم رہا، جبکہ اپنی زیادہ تر زندگی امریکا میں گزاری۔

ترجمان نے کہا کہ واقعے کا پاکستان سے کوئی تعلق نہیں اور نہ ہی گرفتار شخص کی شہریت پاکستان کی ہے۔

یاد رہے کہ امریکی ریاست ڈیلاویئر میں لقمان خان کو غیر قانونی اسلحہ رکھنے اور مبینہ طور پر حملے کی منصوبہ بندی کے الزام میں گرفتار کیا گیا تھا۔

امریکی میڈیا کے مطابق 25 سالہ لقمان خان کو 24 نومبر کی رات اس وقت حراست میں لیا گیا جب پولیس نے کینبی پارک ویسٹ میں ایک ٹرک کو روکا۔ پولیس کا کہنا ہے کہ ملزم نے گاڑی سے باہر نکلنے کے احکامات ماننے سے انکار کیا اور مزاحمت کی، جس کے بعد اسے گرفتار کیا گیا۔

تفتیش کے دوران پولیس کو ٹرک سے پستول، میگزین اور مبینہ حملے کی منصوبہ بندی سے متعلق دستاویزات ملی ہیں۔ برآمد شدہ کاغذات میں یونیورسٹی آف ڈیلاویئر کے پولیس اسٹیشن کا خاکہ، داخلی و خارجی راستوں کی نشاندہی اور ایک پولیس افسر کا نام شامل تھا۔