مردہ ماں کا بہروپ بدل کر برسوں تک پنشن حاصل کرنے والا شخص، اٹلی میں لرزہ خیز واقعہ

اٹلی سے تعلق رکھنے والے ایک شخص پر الزام ہے کہ اس نے اپنی انتقال کر جانے والی ماں کی لاش کو چھپا کر رکھا اور خاتون جیسا لباس اور میک اپ کرکے گھومتا رہا تاکہ پنشن حاصل کرسکے۔

2022 میں انتقال کر جانے والی خاتون کی لاش کو اس شخص نے اپنے گھر میں ہی چھپا کر رکھا ہوا تھا۔

56 سالہ شخص اٹلی کے علاقے Mantua سے تعلق رکھتا ہے اور وہ بیروزگار تھا۔

مگر ماں کی لاش کو چھپا کر وہ خاتون کی پنشن سے ہزاروں یورو حاصل کرنے میں کامیاب رہا۔

اطالوی میڈیا کی رپورٹس کے مطابق اس نے ماں کی لاش کو اپنے خاندانی گھر میں چھپا کر رکھا اور وہ حنوط ہوگئی۔

Dall’Oglio نامی خاتون کا انتقال 82 سال کی عمر میں 3 سال قبل ہوا تھا مگر بیٹے نے اس بارے میں کسی کو نہیں بتایا اور لاش کو ایک شیٹ میں لپیٹ کر سلیپنگ بیگ میں رکھا اور چھپا دیا۔

رپورٹ کے مطابق پھر اس شخص نے اپنی ماں جیسے کپڑے پہنے اور میک اپ اور زیورات کا استعمال کرکے خاتون کے شناختی کارڈ کی تجدید ایک حکومتی دفتر سے کرائی۔

اس شخص نے اپنے بال بھی کٹوا کر ماں جیسے بنالیے تھے۔

نومبر کے شروع میں وہ Mantua کے مضافات میں واقع ایک حکومتی دفتر میں گیا اور خود کو Dall’Oglio کے طور پر پیش کیا۔

مگر وہاں کے ایک ملازم کو شبہ ہوا کیونکہ اسے اس ‘خاتون’ میں کچھ عجیب محسوس ہوا تھا، جبکہ اس کی آواز بہت بھاری تھی۔

اس نے فوری طور پر اسے پولیس کو رپورٹ کیا اور مقامی میئر کو بھی آگاہ کیا۔

بعد ازاں خاتون کی حکومتی تصاویر کا موازنہ کیا گیا تو انہوں نے بیٹے کو شناخت کرلیا۔

اس شخص نے 3 برسوں کے دوران اپنی ماں کی پنشن اور 3 جائیدادوں کی بدولت سالانہ 53 ہزار سے زائد یورو وصول کیے۔

جب اسے گرفتار کرلیا گیا تو پولیس نے اس کے گھر کا جائزہ لیا، جہاں انہوں نے خاتون کی لاش کو لانڈری روم میں دریافت کیا۔