برطانیہ میں سیاسی پناہ(اسائلم )کے لیے پاکستانی شہری سب سے آگے

لندن: برطانیہ میں سیاسی پناہ (اسائلم) کے لیے پاکستانی شہری سب سے زیادہ درخواستیں دینے والے بن گئے ہیں۔

برطانوی اخبار دی ٹیلی گراف کے مطابق، سال 2024 میں برطانیہ میں مجموعی طور پر 40 ہزار اسائلم درخواستیں جمع ہوئیں، جن میں سے 11 ہزار سے زائد پاکستانی شہریوں کی تھیں۔

اعداد و شمار کے مطابق یہ تعداد 2022 کے مقابلے میں پانچ گنا زیادہ ہے، اور پاکستان 175 ممالک میں سب سے زیادہ اسائلم درخواستیں دینے والا ملک بن گیا ہے۔

رپورٹ میں بتایا گیا ہے کہ تمام پاکستانی درخواست دہندگان قانونی ویزوں، جیسے وزٹ، ورک اور اسٹوڈنٹ ویزے کے ذریعے برطانیہ آئے تھے اور بعد میں اسائلم کے لیے درخواست دی۔

برطانیہ کے شیڈو ہوم سیکرٹری کرس فلپ نے اس صورتحال کو ویزا سسٹم کی “مکمل ناکامی” قرار دیا اور کہا کہ ویزا اور بارڈر سسٹم کے غلط استعمال کو روکنے کے لیے سخت اور فوری اقدامات کی ضرورت ہے۔