راولپنڈی: 26 نومبر احتجاج کیس ،علیمہ خان کی مشکلات میں مزید اضافہ

راولپنڈی: انسدادِ دہشت گردی عدالت نے بانی تحریک انصاف کی ہمشیرہ علیمہ خان کے خلاف ایک بار پھر ناقابلِ ضمانت وارنٹ گرفتاری جاری کر دیے ہیں۔ یہ وارنٹ ساتویں مرتبہ جاری کیے گئے ہیں۔

تفصیلات کے مطابق، راولپنڈی کی انسدادِ دہشت گردی عدالت میں 26 نومبر احتجاج کیس کی سماعت ہوئی جس میں علیمہ خان سمیت 11 ملزمان نامزد ہیں۔ سماعت کے دوران علیمہ خان اور ان کے وکلا ایک بار پھر عدالت میں پیش نہ ہوئے۔

عدالتی حکم عدولی پر عدالت نے علیمہ خان کے ساتویں ناقابلِ ضمانت وارنٹ گرفتاری جاری کرتے ہوئے، ان کے بینک اکاؤنٹس منجمد کیے جانے سے متعلق رپورٹ بھی طلب کر لی۔

پیش کی گئی رپورٹ میں بتایا گیا کہ متعلقہ بینکوں میں علیمہ خان کے نام پر نمل یونیورسٹی اور دیگر فلاحی اداروں کے اکاؤنٹس موجود ہیں۔ عدالت نے اُن بینکوں کو نوٹس جاری کر دیے ہیں جنہوں نے تاحال رپورٹ جمع نہیں کرائی۔

عدالت نے علیمہ خان کے وارنٹ برقرار رکھتے ہوئے کیس کی سماعت 6 نومبر تک ملتوی کر دی۔

واضح رہے کہ علیمہ خان سمیت دیگر 10 ملزمان کے خلاف تھانہ صادق آباد میں 26 نومبر کے احتجاج کے سلسلے میں مقدمہ درج کیا گیا تھا