اقرار الحسن کی وائرل تصویر نے سوشل میڈیا پر نئی بحث چھیڑ دی

لاہور:پاکستان کے معروف میزبان اور انویسٹی گیٹو جرنلسٹ اقرار الحسن ایک بار پھر اپنی ذاتی زندگی کی وجہ سے سوشل میڈیا پر موضوعِ گفتگو بن گئے ہیں۔

گزشتہ روز سے اقرار الحسن اور ان کی اہلیہ عروسہ خان کی شادی کی سالگرہ کی ایک تصویر تیزی سے وائرل ہو رہی ہے۔ دلچسپ بات یہ ہے کہ اس تصویر میں اقرار کی پہلی بیوی قرۃالعین اقرار بھی ساتھ موجود ہیں، جس نے لوگوں کی توجہ اپنی جانب کھینچ لی اور مداح حیرت کا اظہار کر رہے ہیں۔

اقرار الحسن کی تین شادیوں کی خبریں پہلے ہی سوشل میڈیا پر زیرِ بحث رہی ہیں۔ 2023 میں انہوں نے اپنی تیسری شادی کی تصدیق کرتے ہوئے بتایا تھا کہ یہ نکاح ان کی پہلی بیوی قرۃالعین اقرار کی مرضی اور رضامندی سے ہوا تھا۔

اقرار الحسن کی دوسری اہلیہ عروسہ خان کے قرۃالعین اقرار اور پہلاج الحسن کے ساتھ اچھے تعلقات ہیں، اور اقرار خود بھی مختلف انٹرویوز میں اس بات کا ذکر کرتے رہے ہیں۔

حالیہ دنوں میں اقرار الحسن اور عروسہ خان نے اپنی دوسری شادی کی سالگرہ قرۃالعین اقرار کے ساتھ منائی۔ اس تقریب کی تصویر عروسہ خان نے سوشل میڈیا پر شیئر کی، جسے بعد میں اقرار الحسن نے بھی ری پوسٹ کیا۔

تصویر سامنے آتے ہی سوشل میڈیا صارفین نے اس منفرد خاندانی تعلق پر مختلف تبصرے شروع کر دیے۔ کچھ لوگوں نے مثبت رائے کا اظہار کیا، جبکہ کچھ نے تنقیدی ردعمل بھی دیا۔
اگرچہ یہ واضح نہیں کہ سالگرہ کی یہ تقریب کب منائی گئی، لیکن سوشل میڈیا پر شیئر کی گئی تصویر نے ہر طرف توجہ حاصل کر لی۔ کئی صارفین نے جوڑے کو مبارک باد دی اور قرۃالعین کی موجودگی کو خوشگوار مثال قرار دیا۔

واضح رہے کہ اقرار الحسن نے 2006 میں نیوز اینکر قرۃالعین سے پہلی شادی کی تھی، جن سے ان کا ایک بیٹا پہلاج حسن ہے۔بعد ازاں 2012 میں انہوں نے میڈیا پرسن فرح اقرار سے دوسری شادی کی، جسے انہوں نے پانچ سال تک خفیہ رکھا۔اقرار الحسن نے تیسری شادی نیوز اینکر عروسہ خان سے اکتوبر 2023 میں کی تھی۔