میں چاہوں تو پاک افغان تنازع فوراً ختم ہو سکتا ہے:ٹرمپ

امریکی صدر ڈونلڈ ٹرمپ نے کہا ہے کہ پاکستان اور افغانستان کے درمیان جاری کشیدگی کو ختم کرنا ان کے لیے بہت آسان کام ہے۔

اوول آفس میں صحافیوں سے گفتگو کرتے ہوئے صدر ٹرمپ نے کہا کہ مجھے جنگیں رکوانا پسند ہے۔ میں پاکستان اور افغانستان کی حالیہ سرحدی کشیدگی سے پوری طرح واقف ہوں، اور اگر میں چاہوں تو دونوں ممالک کے درمیان یہ تنازع فوراً ختم کروا سکتا ہوں۔

صدر ٹرمپ نے دورانِ گفتگو ایک بار پھر پاک بھارت جنگ بندی کا ذکر بھی کیا اور کہا کہ پاکستان کے وزیراعظم شہباز شریف نے مجھے بتایا کہ میں نے پاک بھارت جنگ ختم کر کے لاکھوں جانیں بچائیں۔

یاد رہے کہ گزشتہ کئی روز سے افغانستان کی سرحد سے پاکستان پر حملوں کا سلسلہ جاری تھا، جس کے جواب میں پاکستانی افواج نے افغانستان میں دہشت گردوں کے ٹھکانوں کو نشانہ بنایا، جس کے نتیجے میں درجنوں خوارج ہلاک ہوئے۔

واضح رہے کہ پاکستان اور افغان طالبان حکومت کے درمیان ابتدائی طور پر 48 گھنٹے کی جنگ بندی طے پائی تھی، جس میں بعد ازاں مزید توسیع کر دی گئی۔

سفارتی ذرائع کے مطابق، دوحہ میں جاری مذاکرات کے اختتام تک جنگ بندی برقرار رکھنے پر اتفاق کیا گیا ہے، جبکہ اعلیٰ سطح کے مذاکرات ہفتے کے روز شروع ہونے کی توقع ہے۔