فضائی آلودگی میں پاکستان پہلے نمبر پر، لاہور دنیا کا آلودہ ترین شہر قرار

لاہور:دنیا کے آلودہ ترین ممالک کی تازہ فہرست میں پاکستان سب سے آگے نکل آیا ہے اور فضائی آلودگی کے لحاظ سے پہلے نمبر پر آ گیا ہے، جب کہ بھارت اس فہرست میں دوسرے نمبر پر موجود ہے۔

ماحولیاتی ماہرین کے مطابق لاہور میں اوسط ایئر کوالٹی انڈیکس (AQI) 304 ریکارڈ کیا گیا، جو انسانی صحت کے لیے نہایت خطرناک اور مضر سطح تصور کی جاتی ہے۔

اسی طرح بھارت کے دارالحکومت نئی دہلی اور پاکستان کے صنعتی شہر فیصل آباد میں بھی فضائی معیار انتہائی تشویشناک ہے، جہاں AQI 221 تک جا پہنچا۔ ماہرین نے متنبہ کیا ہے کہ 302 سے زائد AQI انسانی صحت کے لیے انتہائی خطرناک ہے، جس سے سانس کی بیماریوں سمیت کئی دیگر امراض میں اضافہ ہو سکتا ہے۔

ماہرین کے مطابق فصلوں کی باقیات جلانے، گاڑیوں کے دھوئیں اور صنعتی فضلے کے باعث آنے والے دنوں میں آلودگی مزید بڑھنے کا خدشہ ہے۔ شہریوں کو ہدایت کی گئی ہے کہ وہ غیر ضروری طور پر گھروں سے باہر نہ نکلیں اور ماسک کے استعمال کو یقینی بنائیں۔

دوسری جانب محکمہ تحفظِ ماحولیات نے آلودگی پھیلانے والے عناصر کے خلاف کارروائیاں تیز کر دی ہیں، جبکہ ضلعی انتظامیہ لاہور اور محکمہ ٹرانسپورٹ نے دھواں چھوڑنے والی گاڑیوں کے خلاف کریک ڈاؤن مزید سخت کر دیا ہے۔