بجلی صارفین کے لیے خوش خبری، فی یونٹ قیمت میں کمی کا امکان

اسلام آباد:ملک بھر کے بجلی صارفین کے لیے خوش آئند خبر سامنے آ گئی ہے، جہاں بجلی کی قیمت میں کمی کا امکان ظاہر کیا جا رہا ہے۔

سینٹرل پاور پرچیزنگ ایجنسی (سی پی پی اے) کی جانب سے نیشنل الیکٹرک ریگولیٹری اتھارٹی (نیپرا) میں دائر کی گئی درخواست منظور ہونے کی صورت میں نومبر کی ماہانہ فیول ایڈجسٹمنٹ کے تحت بجلی 72 پیسے فی یونٹ سستی ہو سکتی ہے۔

سی پی پی اے نے بجلی کی قیمت میں کمی کے لیے ماہانہ فیول ایڈجسٹمنٹ کی درخواست نیپرا کو جمع کرا دی ہے، جس پر نیپرا 31 دسمبر کو سماعت کرے گی۔

درخواست میں بتایا گیا ہے کہ نومبر کے مہینے کے دوران ڈسکوز کو مجموعی طور پر 7 ارب 81 کروڑ 30 لاکھ یونٹس بجلی فراہم کی گئی۔ نیپرا میں جمع کرائی گئی دستاویزات کے مطابق نومبر میں بجلی کی اوسط فی یونٹ لاگت 6 روپے 16 پیسے رہی۔

دستاویزات کے مطابق نومبر کے دوران بجلی کی پیداوار کے لیے مختلف ذرائع استعمال کیے گئے۔ اس عرصے میں 39.16 فیصد بجلی پانی سے پیدا کی گئی، 9.34 فیصد مقامی کوئلے سے، 5.06 فیصد درآمدی کوئلے سے حاصل کی گئی، جبکہ 8.44 فیصد بجلی گیس سے اور 8.64 فیصد درآمدی ایل این جی سے پیدا ہوئی۔ اسی طرح 25.23 فیصد بجلی جوہری ایندھن سے حاصل کی گئی۔

اگر نیپرا کی جانب سے سی پی پی اے کی درخواست منظور کر لی جاتی ہے تو ملک بھر کے صارفین کو 72 پیسے فی یونٹ بجلی سستی ملنے کا امکان ہے، جس سے مہنگائی کے دباؤ میں کمی کی امید کی جا رہی ہے۔