ماہانہ پانچ سو روپے کمانے والے کپل شرما کے پاس اس وقت کتنی دولت ہے؟

نئی دہلی:مشہور بھارتی کامیڈین اور اداکار کپل شرما اس وقت میڈیا کی زینت بنے ہوئے ہیں، اور اس کی دو بڑی وجوہات ہیں۔ ایک تو ان کی نئی فلم ’کس کس کو پیار کروں ٹو‘ 12 دسمبر کو ریلیز ہوئی ہے، اور دوسری وجہ یہ کہ اداکارہ پریانکا چوپڑا نے ممبئی میں سیزن فور کے ’دی گریٹ انڈین کپل شو‘ کے ایک خصوصی اپیسوڈ میں شرکت کی، جو شائقین کے درمیان کافی مقبول ہو رہا ہے۔

اس شو کی مقبولیت میں مزید اضافہ اس وقت ہوا جب سیاستدان اور سابق کرکٹر نوجوت سنگھ سدھو نے بیک اسٹیج تصاویر شیئر کیں، جن میں پریانکا چوپڑا کو کپل شرما، ارچنا پورن سنگھ اور سنیل گروور کے ساتھ دیکھا جا سکتا ہے۔

این ڈی ٹی وی کے مطابق، کپل شرما صرف ایک کامیڈین ہی نہیں بلکہ بھارت کے سب سے کامیاب اور مقبول انٹرٹینرز میں سے ایک ہیں۔ پنجاب کے گاؤں سے تعلق رکھنے والے کپل نے سخت محنت اور جدوجہد کے بعد کامیابی حاصل کی، اور آج ان کی مجموعی دولت تقریباً 300 کروڑ روپے بتائی جاتی ہے۔

والد کے انتقال کے بعد، کم عمری میں ہی کپل شرما نے گھر کی ذمہ داریاں سنبھالی تھیں اور پی سی او اور ٹیکسٹائل مل میں معمولی نوکریاں کیں۔ لیکن ان کی زندگی کا رخ اس وقت بدل گیا جب انہوں نے ’دی گریٹ انڈین لافٹر چیلنج‘ جیتا۔ اس کے بعد ’کامیڈی سرکس‘ اور ’کامیڈی نائٹس ود کپل‘ نے انہیں ہر گھر میں مشہور کر دیا۔

نیٹ فلکس پر اپنے شو ’دی گریٹ انڈین کپل شو‘ کے ذریعے کپل شرما نے نئی کامیابی حاصل کی، جہاں رپورٹس کے مطابق وہ ہر قسط کے لیے تقریباً پانچ کروڑ روپے کماتے ہیں۔

کپل شرما ممبئی میں رہائش پذیر ہیں، اور ان کے پاس قیمتی جائیدادیں، لگژری گاڑیاں اور کینیڈا میں کیفے کا بزنس بھی موجود ہے، جو ان کی شاندار کامیابی کا مظہر ہے۔